2003年 09 月 28 日 星期日 【晴】
同峰少、阿DICK、LION、CWYNETH響味千食完LUNCH，我地就上左何文田公園換Ｕ，跟住就上HEAD開DM。本來打算等埋CWYNETH
然後一齊去食TEA，點知一等就等到六點幾，結果都係各自歸巢。夜晚SUKI
姐約我出黎俾左疊NOTES
我，仲叫我有咩唔識既可以問佢。最近幾日先開始發覺原來好多朋友仔都無忘記我，仲好關心我，令我覺得自己一定要開開心心咁努力完成呢個高考！小黑，加油呀！各位要考會考同高考既朋友仔，努力呀！
2003年 09 月 27 日 星期六 【晴】
終於俾我借到＜鴿子園＞既廣播劇ＣＤ啦！由於我張證得返三個位，所以淨係借左頭三隻。聽左頭兩隻，真係好正！三點幾上左峰少度同阿DICK、叡叡、傻鴨打牌。七點幾我地就走左，阿DICK上左我屋企食飯。之後叡叡都上埋黎，我地一齊去送阿DICK搭車，再送叡叡返去。最後要多謝家倫幫我班左個中國紅十字會會章返黎，唔係既話聽日開會我就有個COM會唔齊Ｕ架啦…當然都要唔該ANNIE
同剛剛啦∼
2003年 09 月 26 日 星期五 【晴】
放學前個問答比賽做到有Ｄ慶，不過事後我都由得佢LU，反正我都唔駛再做。返屋企食Ｄ野訓左陣，四點幾落到旺角SNIPER同我班既同學「再戰1942」！七點幾我地落左樓下間酒樓度打邊爐，同阿湧慶祝＆同哥拉補祝生日。一齊去既仲有家曦、麥當奴、BYRON、唐唐、阿榮、阿淳、林媚、SALLY…雖然全部人都識既，但係都好似覺得自己同佢地格格不入咁。九點幾就走先，返屋企俾低部相機俾家姐，之後就去接峰少、叡叡、牛牛同關邦落堂，一齊去食糖水＆玩玩玩玩玩。送左牛牛同叡叡返屋企，我就去７仔買埋件嘉仕伯既迷你波衫∼！
2003年 09 月 25 日 星期四 【晴】
放左學，用十蚊食左廿幾蚊野，因為李林峰請客。唔知佢今年做咩乖仔左咁多，次次開會同步操都有黎。兩點左右我就同佢地落公園練操練到三點九，之後上總部攪續期，五點幾就落旺角睇下Ｄ英文文法班既資料。六點幾先上到自修室，好開心因為撞到壽星女哥拉，仲係今年第一個送生日禮物俾佢既男仔添∼ ^^ 返到屋企之後仲開心，一來係因為知道左楊采妮會復出拍戲做女主角，我等佢復出都等左就快十年啦！佢雖然無以前咁後生，但係比以前更加有氣質！二來係同上次響太陽計劃度識既ST.
JOHN 既 Cathrine
傾ＩＣＱ。識到呢個朋友仔我覺得好開心，最初見到佢覺得佢個樣幾
COOL，我都唔敢問佢拎ＩＣＱ，不過傾落先知原來佢都幾玩得，而且仲好無架子添∼！再加上佢真係有心去睇我寫既故事，仲問左Ｄ關於個故事既問題，令我覺得更加開心∼！ ^^
2003年 09 月 24 日 星期三 【晴】
今日放左學之後同周仔去左唱Ｋ，唱到四點左右我地就去左潮特同兆萬度行左陣，因為我想買Ｄ野，不過結果都係搵唔到。五點前就上到中央自修室溫書，對面仲有個靚女坐正響我面前，攪到我掛住望佢都做無心機做功課添∼！（藉口！ ^^"）
最近借左一本叫做＜一百個人的遺憾故事＞既書。我大約睇左一半，有好多道理、有好多至理名言，其中有兩句名人既雋語我覺得幾好。一句係「雖然世界充滿痛苦，但也充滿克服痛苦的喜悅。 －－海倫．凱勒」另一句係「一個人並不是生來要給打敗的！ －－海明威」呢兩句說話對我好似有Ｄ啟發。
夜晚同家姐傾ＩＣＱ，家姐係彭羚既支持者。佢送左一段歌詞俾我「過去已過 已飄去 流逝片段總念記 誰人清楚一生怎過 誰願與我永遠也一起…」講出左我而家既心情。但係我都有一段「記憶中的你 難以再愛亦吸引 也許今天 不應再見 沾污了那情感…」可以話我斷章取義，但係呢段係我而家既心聲。
2003年 09 月 22 日 星期一 【晴】
凌晨時分，我座樓個警鐘誤鳴左兩次，每次都差唔多響足成個鐘，結果七點三先起身，比平時遲左九個字先起身。雖然個人暈暈地，不過都好，因為俾我撞到我既好徒兒笑笑∼！^^ 放左學，我同周仔、豬豬去左稻香飲茶，食左勁多野都只係每人＄３５，好抵！送左豬豬去搭車之後，我同周仔上左潮特買糖，點知見到BOY'Z
既KENNY，周仔第一時間去拎左佢既簽名，我一向對拎明星簽名無咩興趣，所以淨係影左張唔清既側面相就走左。行返上中央自修室，做功課做到七點左右就返屋企。
2003年 09 月 21 日 星期日 【雨】
八點幾就要起身，因為今日要幫CURRIE
手去帶一班新移民去遊香港。今次要帶十二個小朋友出去，由中心經香港公園再去搭纜車上山頂，再去天星碼頭搭船過尖沙咀行鐘樓、文化中心、手工藝攤檔、太空館、科學館……最開心係響纜車站同個外國人傾左一陣計，然後同佢個女影相。ＢＢ女個樣好得意（CURRIE
話佢唔可愛囉… >.<"）我影左佢兩張相。另外我又同成龍個蠟像影左張相，不過入左去中心部電腦度，無得睇返……響中心問埋佢地一Ｄ問題同響STAFF
ROOM
玩左陣，七點左右就返屋企。可能因為淋過雨之後係咁出入冷氣地方，返到屋企個頭好痛，頭痛指數係７，強度屬於偏高。睇黎都係快Ｄ沖涼訓算啦。
2003年 09 月 21 日 星期日 【晴】
3:37AM，剛把你之前介紹我聽的＜MUSIC ALL NIGHT＞的歌詞改了。這是我最快完成的一次，在事前沒有準備過的情況下只用上了一個小時多來完成，可能是因為寫的都盡是心底裡的話……
＜Music
All Night＞
多少個晚上我聽風耳 邊吹過
然後發現身在城市中 多寂寞
是我太懵懂 還是想得太多 想你某天 終會離開我
春季後過不了沒有你 的生活
腦海裡不停重演有你 的鏡頭
有一個承諾 我把它藏心中 可是它 讓我心痛
多希望聽聽你藏在內心的聲音 我們是否還作同樣的夢 唱同首歌
When there’s music all night 在你不開心的時候 可會想起我
但我不想你難過 心煩亂能做甚麼 When I sleepless over nigh
When there’s music all night最思念你的時候竟 想你忘記我
沒了煩人的我 你就能好好的活 但也希望我猜錯
When there’s music all the night When there’s music over nigh
When there’s music all the night Night to night
2003年 09 月 20 日 星期六 【晴】
或許世上真的有咀咒。我認為它是由潛意識、心底裡的記憶與感覺對情緒作出的一種投射反應。斷斷續續的來電，為了一個「等」字而光拿著手提電話不說話的五分鐘，把我好端端的心情一下子扭轉。本來打算到宣誓典禮去結識其他團隊的一些新幹事，結果連跟已認識的朋友也說不上幾句。我已盡了我的能力去裝瘋賣傻，但裝出來的樣子連自己都接受不了。本來打算跟朋友們漫無目的地去逛逛，最後卻獨個乘車回家去。
接近一個小時的車程，精神散亂的隨車子的移動而搖晃。回到家中睡了一覺，然後糊亂吃了些東西。呆呆地坐在電腦桌前，忽然好想找個人到外頭去傾訴一下。可是放眼望去，名單上現下就可約出來的人寥寥無幾。最後還是沒有約任何人，沒有把心裡的話說出來。不想在家用電話，不想家人聽到後為我擔心，但我不知道自己還可以做些甚麼……
2003年 09 月 19 日 星期五 【晴】
本來放左學俾個人攪到勁爐氣，嬲到想發脾氣打人。好彩同阿DICK＆叡叡食完LUNCH
之後Ｄ情緒都叫做平伏返。上左中央自修室做功課，做完同上次一樣畫左幅牛牛既畫俾峰少。六點左右走，我同叡叡陪牛牛上何文田廣場買野食同搵佢家姐，大約七點牛牛就搭車返屋企，我就送叡叡去樂民中心，然後返屋企食飯。十點鐘落中心接峰少、叡叡、牛牛同關邦佢地放學，今次傻鴨同埋我地一齊去食野，我地去左打冷，我帶左Ｄ新相同兩本舊相簿去俾佢地睇，睇睇下我地講返好多以前響紅會既事。牛牛話我地好似Ｄ阿叔聚舊咁，其實我都認我今年既思想上老左好多，或者係因為發生左太多事……食完野，我同峰少邊行邊講返以前Ｄ事，諗返以前Ｄ人，發現身邊好多曾經玩得好埋既朋友都已經離開左我既生活。人大左，有既反而好似愈來愈少……不過段段回憶裡面，點都係開心既多。
2003年 09 月 18 日 星期四 【晴】
因為要上ＰＥ堂，整臭晒件校服，所以我返左屋企食完野沖完涼再訓個覺之後，首先落旺角捐血站交返張捐血大使證先。幫我收證既係好靚既
CAROL
姐姐。因為人唔多，所以我地傾左一陣。之後我就行返學校拎返本書，再返過土瓜灣圖書館個自修室度做功課。夜晚響屋企食完飯，八點幾同崔峰去拎之前晒Ｄ相，原來我晒左成百幾張…
^^"
返到屋企將Ｄ相分好晒類，揀左Ｄ放落自己本相簿度，然後心血來潮執乾淨左電腦檯個櫃桶。反覆咁睇下Ｄ相，真係好想再見返Ｄ朋友仔！
2003年 09 月 16 日 星期二 【雨】
本來打算放左學去溫書，但係要教佢地操旗，結果一教就教到四點半，個人好倦，所以早左返去拎左百幾蚊既影印，然後打算返屋企休息。返到去，又有野做攪到無得休息。食完飯入返Ｄ相落張卡度打算拎去晒，約左崔峰去但係去到晒相鋪閂左門。
打擊好似鍛煉完之後再返黎，打得好快、擊得好痛。每個人既心諗Ｄ乜野，我好似愈黎愈睇唔清。以前我可以估計到其他人下一步會點做，但係而家連佢地做緊咩我都唔知。或者上天已經回收左我既能力，又可能我應該要休息下。我個人已經唔止倦，係疲……
2003年 09 月 15 日 星期一 【雨】
今日放學終於上左自修室溫書。溫左個零鐘，峰少、叡叡、阿維都落左黎。四點幾牛牛都落左黎。我地一齊溫到六點七，之後我就同叡叡、牛牛一齊行返去。買左Ｄ野，叡叡走先，我就送牛牛返屋企。跟住麗文打黎叫我上中心幫手做野，本來我淨係扮下唔想做，其實做少少咁簡單既野都無問題，但係麗文講左一句說話，就好似將一支鐵釘插入我個心度。「你同佢無可能架啦，死心啦！」可能我做既一切都只會令佢覺得煩、打擾到佢既生活。又或者我應該放棄，死左條心。始終一個人唔開心，總好過兩個人唔開心……
灰灰的天 空空的街 千串細雨點 用斜紋交織出一張冷面
微涼的風中 街中一把遭棄置的破傘 像說 怎麼過 這一天
曾很喜歡 陰陰天 因我愛看雨點 在微涼風中洒向妳 輕吻妳面
然而今天 空空的街中 飄飄雨內 沒有妳 陰的天 極討厭
冷冷雨 沒焦點因找不到妳 冷冷雨低泣彷彿要等妳經過
我說冷雨求求停吧 別追憶泡影一個 忘掉雨裡過去有愛侶走過
雨點不清楚 妳已拋低我 仍共疾風東奔西走的找妳 彷彿不知不再會有結果
妳永不清楚 妳那天經過 留下萬千追憶一生封鎖我 今天可否會 想起我…
2003年 09 月 12 日 星期五 【晴】
既然係今朝既事咁就接埋落去啦∼！晨咁早既五點幾六點，崔峰同清清上左我屋企，崔峰就睇相，清清就訓覺。崔峰走左之後，我開歌聽到十二點左右，清清醒左。我地睇左陣電視之後我就送左佢去搭車。我返到屋企無聊左陣又睇左套ＤＶＤ，五點幾就訓，九點幾電話響叫醒左我。出左去同LYDIA飲野&傾左陣計。好耐無見，有好多野想講但係又好似無咩點講到野。飲完野去左幾間無朱古力味軟雪糕賣既７－１１，十一點幾我就送左佢返屋企。我就返屋企睇邵氏Ｄ舊片睇到五點幾先訓，但係七點鐘就醒左…
2003年 09 月 11 日 星期四 【晴】
一放學我就返左屋企，因為隻眼好唔舒服。返到屋企睇埋幾套短片之後就訓到五點幾，去圖書館還左幾本書然後搭車上阿爺屋企做節。九點零鐘我同家姐走先，我返到屋企沖左個涼，跟住就上紅燈山同大家會合。幾經辛苦咁上到去足球場，離遠已經見到佢地。我地上去又玩數字球又講鬼故，當然仲有食月餅啦∼！玩到兩點幾，大家都差唔多時候要返屋企。送晒佢地去搭的士之後，我同崔峰、清清、濠哥、SEVEN過左去公園度傾計，一傾就傾到第二朝。
2003年 09 月 10 日 星期三 【晴】
終於看了一部想看了很久的電影，＜假如愛有天意＞。記憶中這是第一次獨個去看電影。那種感覺不大好，雖然一個人跟一群人在看電影時都同樣是看著銀幕，但很不喜歡看完了後那種孤單的感覺。話雖如此，但看著這部電影，藉機哭了幾趟，人始終是舒服了些……
2003年 09 月 09 日 星期二 【晴】
到了圖書館，從書架上取下了一本書，＜遠離寂寞＞。
發現自己真的出了問題，除了右眼昨天開始不知名地痛到此刻仍未停止外，人也逐漸變得似是有點自閉的。想知道自己為何像被世界孤立，也想知道為什麼想孤立自己……
希望能盡快找出自己的問題，因為這種感覺著實不好受……
2003年 09 月 08 日 星期一 【晴】
無心情做功課，心血來潮睇下人地既日記又睇返自己以前既日記。然後坐響張櫈度諗左陣野。
以前我唔相信一個人既情緒會受另一個人既行為舉止、甚至乎無任何行動所影響。之後我相信我有能力用言語同身體動作去影響其他人，不過唔信有人可以影響到我。但係而家我信，我信我既情緒可以因為一Ｄ細微既變化而被影響……
「只差一點點 即可以再會面
可惜偏偏剛剛擦過
十面埋伏過 孤單感更赤裸
總差一點點 先可以再會面
彷彿應該一早見過
但直行直過 只差一個眼波 將彼此錯過……」
14:47 同 15:06
已經係兩個唔同既世界……
2003年 09 月 08 日 星期一 【晴】
一放學，我地團幾個新舊幹事再加埋崔峰一齊去搵ＵＯ，成功以開會為名食左佢一餐。之後同崔峰一齊行去我屋企，我上左紅記仔女討論室睇左陣，又俾左Ｄ遲下打算一齊晒既相佢睇，吹左陣水，到六點左右佢就走，我就繼續攪我既無聊野。日子，就係咁過。
2003年 09 月 07 日 星期日 【雨】
ＤＰ既最後一堂，照舊十點前幾分鐘去到京士柏公園（仲響的士裡面見到峰少行緊上去）。今日十二點左右考試，之前都操得好好地，但係唔知係咪有帶頭既同學太緊張，結果因為成日變速而操得唔係幾好。考完ＤＰ我地一齊影左Ｄ相，之後我地未換衫就去左食野。我上左峰少度借個地方沖涼換衫，順便玩埋先走啦∼！我地打左陣麻雀，之後又睇左＜月光光心慌慌＞，再玩多一陣先走。
響峰少屋企飲左好多加大裝藍帶（好似倒左五罐落肚）。已經唔記得左幾時開始，一有機會就好想整醉自己，呢Ｄ會唔會係唔想面對現實既做法……六點幾一返到屋企就訓，一訓就訓到十二點幾先起身。但係一醒左，現實又會繼續要我去面對佢……
2003年 09 月 06 日 星期六 【雨】
好開心呀！今朝跟ＥＬＳ去派月餅兼做探訪，之後就去食LUNCH。食飽又返上中心，因為要準備下晝同班老人家去攪茶聚Ｄ野。過到茶樓，我同巧婷做司儀同班老人家玩遊戲，仲見返今朝探既一位老人家∼！班老人家又好玩又叻，氣氛又好，真係唔想個活動時間咁短。攪掂晒之後就返中心開Ｅ，跟住睇左陣電視之後就去左送小蓓搭車、送文傑返屋企，跟住我就返黎打日記。夜Ｄ我就要過婆婆屋企做節∼！
ＰＳ：多謝晒呀麗文姐∼！你條手繩織得好靚，犀利∼！
2003年 09 月 05 日 星期五 【陰】
轉堂既時候發呆，忽然間諗到Ｄ野，寫左響本記事簿度：
「沒有人是為別人而活的
每個人都要為生活忙碌
既然如此
別要傷感於被人遺忘……」
今晚傻牛唔舒服，我陪佢響自修室度休息左陣、溫左陣書又傾左陣計。十點鐘我地一行五人（峰少、叡叡、關邦）又去左食糖水。之後邊玩邊送佢地返屋企。如果每一日都可以咁樣嘻嘻哈哈咁過，會係幾好既一件事……
2003年 09 月 03 日 星期三 【晴】
中六上堂教過既野唔記得晒，而家要用半年時間去學新野溫舊野，唔知夠唔夠時間，未知學唔學得識新野，但係肯定會溫到一舊野咁……
十九歲，仲未知自己既心思、路向。或者真係傳統既孻仔性格，想人地幫自己鋪好條路，無意識去打算自己既將來。可能我響呢方面既思想仲係好幼稚啦。
今日諗起一首歌既幾句歌詞，唔知點解忽然間諗起。曾經好鍾意呢首歌，雖然當時唔明Ｄ歌詞但係都不停係咁聽。而家好少再聽呢首歌，但係呢幾句歌詞反而響個腦度，有時會浮返出黎，尤其係開始發呆既時候……
AQUA 既 ＜Aquarius＞
「I wish the stars would turn you in
and leave me standing
in the wind
I
wish the devil gave you up
and
all the snow would melt and stop」
2003年 09 月 02 日 星期二 【雨】
第二日返學就黎打風，仲要係雙風眼，聽聞好多年先有一次，有生之年俾我見到一次都算好彩。由於有兩隻眼，所以我就去左舅母屋企度打麻雀，仲食左好多碗糖水，然後由贏少少變成輸好多，好唔抵。慶幸既係食左好多野，都叫做輸得黎食返去∼！
2003年 09 月 01 日 星期一 【晴】
開學，唔想返學，未做功課。好想放多兩日假，等我可以做埋Ｄ功課。而家要用兩日時間做晒成個暑假既功課，陣間訓一陣又要起身。睇亞視既＜書劍恩仇錄＞第一集，聽到一句對白「當第一眼見到面，大家唔需要對話都知道對方心裡面諗緊咩，呢種就係註定既緣份。」唔知我幾時先會遇到我生命裡面註定既緣份呢∼？！不過點都好，我應承過自己二十歲前唔會再拍拖，呢個係我唯一可以為自己做得到既野。
2003年 08 月 30 日 星期六 【晴】
好耐無試過咁早起身。六點鐘起身沖涼執野，七點左右出門口同叡叡搭車上紅磡火車站同峰少、關邦食早餐。之後阿LING、阿DICK、之姐同HEIDI
都黎到，我地就一齊過去紅磡體育館，仲早左十分鐘集合添！入到去彩排，我代個未同既會員操左十幾轉，然後我就俾小丙叫返出黎去彩排返我自己0個PART。我負責帶出去既小朋友代表原來係個又靚又可愛既小妹妹黎架！佢有一個靚女都用既名，叫嘉欣（OR家茵、家欣、嘉茵…啦，總之都係呢個發音）。我全日就係同佢響紅館周圍走，睇黎佢，同佢＆其他小朋友玩。不得不提，交安個小朋友都好可愛架∼！LUNCH
本來係大會提供既Ｍ記既包，但係小丙同TRACY
就帶左我地去飲茶，我地邊食邊玩，好快就食飽返過紅館。返到去彩排既時候同其他ＵＧ既人玩，又同班小朋友玩到傻晒，好快就到左七點半，即係正式開始既時間。成個RUN
DOWN 都非常順利，訪問0個PART我都食螺絲既情況都唔係好勁。到最後0個PART
全部有份出場既ＵＧ都出晒黎同身邊既人＆明星握手。到完左個SHOW之後，我地既阿頭袁漢榮先生叫我地嗌RED
CROSS再加十一下拍手，我地仲叫埋響看台既二百個會員落黎一齊嗌添！然後我地又同銀樂隊＆海事青年團既朋友仔影相，然後我地紅記仔女又黎個大合照。最開心係一班朋友仔將「RED
CROSS加十一拍」改為「小黑加十一拍」，仲俾佢地掟起左幾次，0個一剎那真係覺得好感動，因為我響紅記識一班咁支持我既好朋友，我諗死前諗起呢一幕，都會覺得我既人生真係無憾！到十一點幾我地落左黃埔度食左Ｄ野，然後就各自返屋企，因為大家今日都已經好倦啦…
我準備左響訪問度要講既野其實仲有架，不過佢地話時間有限唔可以講太多，所以我要響呢度講返出黎：「響紅十字會度我除左學識左之前講既技巧之外，我仲認識左一班對我好好既朋友！無左佢地，我諗我都唔會響紅十字會留到呢一刻！」
＜－－我地紅十字會既代表嘉欣∼！
＜－－交通安全隊既小朋友代表
JENNY∼！
2003年 08 月 29 日 星期五 【晴】
上總部搵翠湖傾左聽日訪問Ｄ野之後，我落左旺角捐血站做埋最後一日既捐血站當值。臨走既時候阿佘姑娘請我食左個月餅。我覺得好唔捨得佢地，因為捐血站既姑娘同工作人員個個都好好人，對我好好……真係想繼續做落去呀！
2003年 08 月 28 日 星期四 【晴】
由尋日開始，我繼續去返捐血站當值。尋日由十二點做到六點，今日就做到八點，即係聽日做多四個鐘我就做夠晒∼！離開左捐血站，換左件就去同蘇凱怡慶祝生日。佢地打左個好貴既邊爐，我扁桃腺痛又食唔到幾多野，雖然我九點幾鐘走左先，不過都知道每人要俾＄８０…真係嚇親我…九點十一，約左LYDIA
去睇＜我的 BAND 5
男友＞，點知我遲左去到九龍灣百老匯，好彩都唔係遲好多，入到去戲院套戲先開始左少少。睇完戲，搭車返黎土瓜灣，響公園傾左陣計之後就返佢返屋企，返到去牛牛屋企附近咁橋崔峰又響0個頭，結果我地兩個就響我屋企樓下個公園度傾計傾到成兩點鐘先返去。
2003年 08 月 27 日 星期三 【陰】
而家既時間係朝早九點半，我由伊利沙伯醫院返黎。尋晚八點左右返到屋企已經開始發燒，燒到今朝終於頂唔住，七點左右入左急診室。醫生話係扁桃腺發炎，可能仲會燒多三四日。食左Ｄ藥，而家雖然退左Ｄ燒，但係個頭仲好痛……
2003年 08 月 25 日 星期一 【陰】
一點幾，約左好妹妹清清、阿DICK、JIMMY同關邦去睇＜龍咁威＞，幾好笑，好似之前睇戇Ｊ咁由頭笑到落尾。睇完戲睇佢地打左陣機，送左清清走之後，本來我都打算搭車返屋企。但係我望住架車去到我屋企附近，忽然間唔想落車，反而想搵個地方行返去，於是我去到佐敦先落車行返屋企。響一條搭十幾年車差唔多每個月都會經過既公路附近行返屋企，邊行邊影相，忽然發現自己雖然住左呢區十幾年，但係完全未行過呢條路。可能有好多野，響自己身邊真係會忽略左，唔係專登去搵既話可能一世都唔會發現到……行過紅磡殯儀區，天色已晚，一種寂寞、靜默既感覺，唔好受，但係感受好重……
2003年 08 月 23 日 星期六 【晴】
一連串既節目：８：００－１０：１５，返學校攪中一迎新活動，跟住飛返屋企沖涼換衫。１１：３０－１６：３０，服務計劃連開Ｅ，事後個人勁躁。１７：００－２０：００，同崔峰、椰子響旺角女人街度食左個好正既奄列蛋飯，然後行左陣街，買左Ｄ野。２０：００－２３：４５，同班好多年無見既小學同學去PIZZA
HUT 度食野，然後過左CYBER CITY
打機。見返鄭柏基、何俊希、莫美琪、葉寶兒，好開心，因為大家都好叻，相比之下最渣既應該都係我啦…… ^^"
2003年 08 月 22 日 星期五 【陰】
十一點幾，出左旺角同峰少、濠哥、叡叡、阿DICK、JIMMY一齊唱Ｋ，唱完去左信和行左陣，行完佢地走先，我就行埋潮特。本來想買野俾ANNIE，結果變左買野俾我Ｄ
FIGURE……返屋企訓左陣，之後落左中心做功課。十點鐘，同峰少、牛牛、叡叡、關邦去食糖水。如常送左牛牛同叡叡返屋企之後先到我返屋企。
同叡叡傾計既時候諗返起一首好歌，發現好多歌既國語版Ｄ歌詞都好廣東話版。好想同有睇我日記既朋友仔分享呢首歌既歌詞，不過上網搵唔到，唯有我邊聽邊打返出黎啦∼！應該唔會相差好遠既……
＜Ｋ歌之王＞國語版
我以為要是唱得用心良苦 你總會對我多點在乎
我以為雖然愛情已成往事 千言萬語說出來可以互相安撫
期待你感動 真實的我們難相處 寫詞的讓我 唱出你要的幸福
誰曾經感動 分手的關頭才懂得 離開排行榜更銘心刻骨
我已經相信 有些人我永遠不必等
所以我明白 在燈火闌珊處為什麼會哭
你不會相信 嫁給我明天有多幸福
只想你明白 我心甘情願愛愛愛愛到要吐
那是醉生夢死才能熬成的苦
愛如潮水 我忘了我是誰 至少還有你哭
我想唱一首歌給我們祝福 唱完了我會一個人住
我願意試著了解從此以後 擁擠的房間一個人的心 有多孤獨
我已經相信 有些人我永遠不必等
所以我明白 在燈火闌珊處為什麼會哭
你不會相信 嫁給我明天有多幸福
只想你明白 我心甘情願愛愛愛愛到要吐
讓我斷了氣鐵了心愛得過火 一回頭就找到出路
讓我成為了無情的Ｋ歌之王 麥克風都讓我征服
想不到你 若無其事的說 這樣濫情 何苦
我想來一個吻別作為結束 想不到你只說我不許哭 不讓我領悟
2003年 08 月 21 日 星期四 【雨】
上總部買左個Ｕ袋之後，我返左去小學。一來係問校長拎返黃老師個電話，二來係好耐無返過去，都好想回憶下當時發生過既事。同校長傾左陣，然後就返左屋企。同老豆、媽咪食完飯，睇左陣ＤＶＤ又訓左陣覺，然後就落中心做功課。點知整親隻腳，傷口好深，過左成兩個幾鐘Ｄ血小板都仲未乾，好痛。
估唔到一個電話可以令一個人既情緒好轉，除左中左咒，我諗唔到第二個方法去解釋呢個情況…
2003年 08 月 20 日 星期三 【雨】
不明白，為什麼人總喜歡不清不楚。
約小學同學出來聚舊，結果要我約人的卻說得不清不楚，一時這樣一時那樣的，教我無所適從。
要一個團委員做事，明知他收到了我的通知，但不結我任何回應，佢做了甚麼我都不知道，又是個不清不楚。
還有……
不清不楚，令人覺得很是辛苦……
2003年 08 月 20 日 星期三 【雨】
今日同崔峰、蘇凱怡、德貞三個去聯校科學展探GAP
維，之後去左新港打機，打完機崔峰走先，我地就去行無印、迪士尼同玩具反斗城。響反斗城買左個FIGURE
同把M&Ms
既遮。行完我地就去食雪糕，跟住我就搭車去拎眼鏡，拎左就返屋企。
2003年 08 月 19 日 星期二 【雨】
今朝過左８７同佢地班小朋友練左陣操，好開心因為見到我既囡囡同好徒兒。操到十二幾我就趕返屋企拎返個團印然後就趕去路德會何文田宿舍做ＳＰ。攪掂晒，開埋Ｅ，我就搭車落旺角同崔峰去食野同行左陣街，之後就返屋企食飯同睇左陣ＤＶＤ，睇睇下自己訓左都唔知，睇黎最近都真係比較倦……
2003年 08 月 18 日 星期一 【雨】
尋晚成家人上左樟木頭，今日朝早就同老豆Ｄ朋友去飲茶，之後就去按摩。幾得意既經歷，我同幫我按摩個女仔（細我一年）響度傾計，佢個名幾靚，叫白霜，因為我都想知道我對國語響聽同講既水平去到邊到。按摩同洗完頭，我等緊媽咪同家姐既時候拎左個FILE
出黎諗住執返好Ｄ畫既次序，點知白霜見到問我借黎睇，睇睇下變左成班人坐晒過黎睇，我仲幫佢同另一個女人畫左幅Ｑ版卡通，我另外送左幅之前畫既畫俾佢，我自己都好開心，難得有人出晒面咁欣賞自己嘛∼！
四點鐘趕返黎，因為六點鐘要去港島辦事處彩排∼過到去見返一大班朋友仔，連上次太陽計劃識既朋友仔都響度，真係好開心∼！我地學唱歌跳舞，再由小丙同我地分組傾埋到時Ｄ細節，九點幾鐘我地就攪掂晒，之後一齊去食飯（睇下記到幾多個先：峰少、阿LING、HEIDY、牛牛、苦榮、LION、阿璟、阿DICK、叡叡、阿SA、關曦、IDA、阿桃、ZEBIE、JOYCE
MA、關邦）食完我地就去搭車。響車度玩左陣，落左車送左囡囡、牛牛同叡叡返屋企，然後就輪到我自己返屋企。
2003年 08 月 16 日 星期六 【雨】
星期四跟ＥＬＳ入左CAMP，同往年一樣都係好好玩，成班人其實都已經熟晒，所以點玩都無咩問題。不過今年既活動就比較上要用多好多體力，所以個人都幾倦，對手到而家都仲有Ｄ淵住痛。玩一個講求組員間信任既遊戲度整親隻眼，而家眼皮度有條痕，唔知好返既時候會唔會有疤痕呢……
星期五出CAMP，返屋企執埋Ｄ野訓左半個鐘頭左右，然後就上阿DICK屋企玩，除左我之外仲有峰少、叡叡、清清、傻鴨、牛牛、阿DICK表哥、邦邦……我地打機、打麻雀、追逐，玩到夜晚峰少、叡叡同牛牛去上跆拳，我地就去左食飯同食雪糕。之後我又返去同峰少佢地去打冷，食到好飽再送埋牛牛返屋企，自己返到去都覺得好倦。
今日一朝早起身同媽咪食完早餐之後就去剪頭髮，都係短頭髮舒服Ｄ。點幾鐘叡叡打電話同我講今日唔駛上ＤＰ，於是我就全日留響屋企度訓，因為前日實在消耗左太多體力，好需要休息一下，所以我就訓左差唔多四個鐘。訓醒無耐就同家姐去買野俾老豆，因為佢二十號生日。買完野我地就上慈哥屋企食飯。上到去見到一大班人，成班都好好玩好攪笑，佢地仲講返後生時Ｄ攪笑野，呢餐真係食得好開心。十點左右我就送家姐去搭車，之後就返屋企。
2003年 08 月 12 日 星期二 【晴】
尋晚阿SA、關曦、清清、媽媽、康康、JIMMY、阿DICK、濠哥同我本來打算一齊去行鳳凰山，但係因為天氣唔好，所以最後無行到，改左去旺角唱Ｋ。本來唱Ｋ都幾開心，但係可能太夜，又可能係Ｄ歌，我想開心都開心唔黎……唱到六點幾，去食完早餐之後就搭車返屋企訓，訓到十點幾又要起身去做ＳＰ。攪左成日，始終覺得唔多掂，開完Ｅ之後就IN埋四個COM，之後就同崔峰過左去關邦屋企玩。上到去，打左一陣牌，食左Ｄ野又飲左幾罐啤酒，之後玩問心0個句。玩到九點左右，我同峰少就送牛牛返去，之後我地就去左７－１１度食野隊啤傾計。送左峰少搭車我就返屋企。返到去同ＪＯＹＣＥ響ＩＣＱ度傾左陣，點知倦得滯訓左……
ＰＳ：峰少、JOYCE，多謝你地！
2003年 08 月 09 日 星期六 【晴】
一朝早同老豆、媽咪食完早餐，我就返左屋企攪PBASE
個相簿同攪返套Ｕ，之後就搭車去京士柏上ＤＰ。今堂過得好快，上完堂我就換衫返馬頭圍同、媽咪、家姐、老豆＆佢既朋友慈哥、阿薩同表哥一齊去翠湖酒家食飯。有得慈哥就一定唔少得要係咁飲啤酒，而且每次都有好笑野，今日佢又同我老豆＆阿薩吹水，成晚笑到我口都彊埋。好記得阿薩傾傾下無啦啦問七月十四係星期幾，我地答佢星期一，老豆就話唔駛咁急，一定會燒野俾佢，仲叫佢揀定款。之後啤酒姐姐幫阿薩斟酒，阿薩話佢住得好遠，響粉巔，慈哥就話阿薩住響和合石，老豆就將「好遠」講做「浩園」，一圍七個人笑左成晚∼！
全日其實都應該叫做過得開心，但係當我送左家姐去搭車，自己一個人返到屋企之後，忽然間覺得成個人謝晒……可能我個心真係太倦。聽左幾首歌，可惜我唔應該聽歌，或者係我聽左Ｄ唔應該聽既歌……
2003年 08 月 08 日 星期五 【晴】
尋日入ＣＡＭＰ今日出黎，俾班小朋友玩到死得咁滯，個人倦到呢……好彩而家要做既野已經攪掂晒，可以好好地訓個靚覺養下傷啦∼！晏晝返到屋企訓左一段時間，夜晚諗住落中心寫陣野，點知落到去先醒起今日牛牛、峰少同叡叡會響中心返跆拳，所以就等埋佢地一齊去食糖水，之後送埋牛牛返屋企我就行返去。
尋晚同班女仔玩左一個好耐無玩過既占卜，兩隻Ａ，由以前既緊貼響一齊，到而家中間隔左一張牌。慶幸既，係相隔一張牌並唔係一個遙遠既距離。但係，我已經知道，呢張牌係代表住我地兩個都唔敢肯定可以令到對方開心，甚至乎只係唔擔心……
2003年 08 月 06 日 星期三 【晴】
今日好開心，因為全家去飲茶。雖然對腳仲好痛，但係都同家姐去左觀塘買書＆去荔枝角買ＦＩＬＥ同筆袋，因為ＴＲＥＮＤＹ ＬＡＮＤ開倉嘛∼！
聽日朝早補完課，下晝就要入ＣＡＭＰ啦∼ 唔經唔覺原來時間過得咁快，睇黎我都係時候要溫書啦∼！（呢句說話好似講左好耐好多次架啦喎……）
2003年 08 月 04 日 星期一 【晴】
晨咁早就同崔峰過左大圍，因為今日同JIMMY、阿DICK
約好左一齊去踩單車。我地由大圍一直踩到去大美篤，仲響大美篤裡面間「環保農莊餐廳」食LUNCH。響呢度食LUNCH
真係好正，因為除左唔貴同好味之外，裝修都做得好靚，而且大廚仲出黎同我地影相添∼！我地邊食邊傾邊玩左個幾鐘先走，然後一直出返去大圍。可惜尾段由於上斜突然用力既關係，我對腳抽左幾次筋……我地還左車就過去仙跡岩飲野，飲完吹完水就搭車返屋企。
2003年 08 月 03 日 星期日 【晴】
今日又要上ＤＰ，十點到一點，之後就過５７既宣誓典禮，幾開心因為５７真係做得好好，而且睇得出佢地俾左好多心機去攪呢次既宣誓典禮。五點幾我就同吹風、JIMMY
去多次書展，因為我想買埋幾本書＆探下家姐個朋友仔。行完就返屋企同媽咪食飯，十點幾就過左婆婆屋企度拜牛郎，拜完又返返屋企上網＆睇書。
最近唔係咁舒服，事實上今日經歷左既節目各有唔同既感覺，可惜我唔夠精神去寫返出黎……
＊仲有一日
2003年 08 月 02 日 星期六 【晴】
登登登登，今日ＤＰ既動作係－－MARK
TIME……真係死得，當精神不足加腳倦遇上最消耗腳力既動作。
一朝早十點鐘已經要上總部開會，開完會又要返屋企整Ｕ，跟住又撲返上京士柏上ＤＰ，好彩上完ＤＰ都仲有時間可以返屋企休息下，終算係一件好事。今日整左個FIGURE
用既斜咩袋，都算整得幾好。我仲將上次同牛牛影既得意相放左上相簿，製成「牛之百態純影集」∼！
＊仲有兩日
2003年 08 月 01 日 星期五 【晴】
一早醒左，老豆又如常開左個收音機嘈住我然後自己又訓返著，不過好既係俾我聽到節目主持講既一番幾有意思既說話。佢講既好明顯係有Ｄ類近時勢造英雄，不過主題就變左做叻人。原來一個人叻唔叻，係睇時局發展輪唔輪到你既專長得到發揮機會，我自己舉個例，就好似Ｄ人玩搖搖叻極都只不過係一種娛樂，但係一段時間興玩搖搖既話你就可以出SHOW
或者開班教人玩搖搖賺錢。所以我唔係唔叻，只係暫時時不與我。
ＪＰＣ既ＢＢＱ，無疑又呃多我一次。本來都無話過會去行山，點知無啦啦就整段山路黎俾我地嘆，早知我就唔去啦，行到對腳有Ｄ倦，聽日仲要上ＤＰ，都唔知點算…
又係一個星期五晚，我又去接峰少、叡叡同牛牛放學，之後一齊去食糖水。我愈黎愈珍惜同我阿哥同哎呀妹妹相處既時間，，可能人大左，開始多野怕，怕有朝一日我地各有各忙然後漸漸疏離，怕某一日我地見到面都只會點頭講聲嗨然後就唔知講咩好……可能我真係有Ｄ過慮，但係我真係好驚，因為我感覺到自己開始有Ｄ變緊……
＊仲有三日
2003年 07 月 31 日 星期四 【晴】
從圖書館借來差不多一個月的＜天空小說＞小說版，今天才來機會靜靜的完全看畢。自聽罷廣播劇版那天後，再一次被「天朗」和「翠碧」這兩個名字震撼心靈。
重複的看了第二十一章的最後兩段不知多少遍。是很窩心的感覺，窩心得差點想哭出來。內容是這樣的：
「 失去了護照的翠碧，呆望著影印店內的時鐘，想像著原本已離地升空的自己，心中非常難受。
而失去了翠碧的真心對待的天朗，感覺著翠碧坐在他身旁但心卻在千里之外，心中亦非常難受。」
而第二十八章的幾段，都教我想了很久：
「 習慣了發動大腦日夜操作思前想後的天朗，明知失而復得，必有下文，世事很公平，很準確，天意更難違，他絕對相信。
DOOD 失去了，卻再擁有 BEEB 。
重新擁有了翠碧，表示即將失去。
表面平靜開心，暗藏洶湧不安。」
還有趙家強的一席話：
「自己喜歡的東西不要亂放，要好好看著，不然的話失去了就找不回來……回來就好，再不要管它曾經去了那裡做過甚麼。」
安靜的在家中過了半天，看了已接觸過的故事，似乎有了些得著，卻又免不了去想些不愉快的事…… ２００３０７３１１６２９
2003年 07 月 30 日 星期三 【晴】
呃人呃自己係一件好辛苦既事，尤其係扮開心然後去引人開心。
好多野失預算，好多野都後知後覺，好多野都攪唔掂……
十一點幾出去尖沙咀，七點幾返到屋企，除左響書展買野時候同賣野既姐姐傾計既幾分鐘真係開心之外，其他時間大部份都係扮開心……睇黎我真係要俾Ｄ時間自己一個人靜靜地坐響屋企休息一下，唔好再去接觸一Ｄ人際上既野。人與人之間實在太複雜，有太多問題，我都唔想再去解決住。始終我都係一個現實逃避者……
2003年 07 月 29 日 星期二 【晴】
唔經唔覺又過左幾日。今日一朝早十點幾就俾人呃左返學校，因為起初叫我返去同佢地練操，點知返到去原來得三個人，仲要去左玩唔肯操。我就本住操唔操由佢地話事既精神任得佢地玩，因為操完係佢地既得著，佢地自己放棄，我都無謂勉強佢地。之後我就同阿WEST、PETER仔落左旺角食野同行左陣街，然後一齊搭VAN
仔上總部上堂，最後既一堂MR。上堂既時候係咁玩，引到佢地笑得好開心，上完堂之後我就同PETER
仔搭返車返屋企。
唔知點解，明明上堂既時候都仲叫做玩得好開心，但係返到屋企就成個人謝晒、DOWN晒……
2003年 07 月 25 日 星期五 【陰】
前日已經想寫日記，不過真係好倦。前日同米恆慶祝生日，夜晚睇左＜海底奇兵＞，個故事都好好睇，雖然好傳統迪士尼既動畫感覺，但係比較有寓意同感人，亦都攪笑好多∼講返今日，朝早同媽咪食完早餐之後，十二點幾就上左三一中心度稿，因為兩點幾就要過信義小學做個活動既司儀。由於入小學又有家長，所以我除左唔可以戴超之外，仲用紙整左條呔同手巾貼上件衫度，真係靚仔到震∼ 完左活動又同班小朋友影左幾張相，之後巧婷請食TEA，食完我就同ANNIE
返屋企，之後填埋份詞。
食完晚餐無耐又同麗文過三一中心搵ＣＹ傾計，然後又行返樂民中心，因為峰少、叡叡同牛牛第一日跟傻鴨學跆拳。我地一齊去食糖水，然後送峰少去搭車，之後又送牛牛返屋企，響正三一中心後面，全日就係咁響三一同土瓜灣之間走黎走去……
睇電視既時候聽到句幾有意思既說話：「神仙同凡人不同之處，係人成日都會搵Ｄ野黎煩，日又煩夜又煩，仲要搵多個人煩上加煩，呢Ｄ就係真正既『煩』人……」我終於明白點解自己成日都有野煩，睇黎真係因為我諗得太多……
唱Ｋ無意間搵返呢首舊歌…
＜感動害人＞
在那天 彼此講過甚麼 為何然後會問 有沒有將說笑也當真
是那天 一聲咳嗽未清 為何隨便關心 誰讓你亂說保重要緊
*而我 不記得感動害人 因你錯跳的心 還以為並沒事發生
*
#我本應 用盡全力躲避我沒有犯過的錯 我本應 默認相戀總要結果
我本應 用盡全力保佑你沒有犯我的錯
卻怕感覺 那會輕易 話過便過 難怪便怪易於感動是錯
#
未有的 不應該太認真 為何還在慶幸 要是有相信你也肯
但你都 不應該信預感 明明容易愛人 仍願意被我牽動髮根…
Repeat * # #
2003年 07 月 21 日 星期二 【雨】
呢輪做左好多野，好鬼倦，所以無乜時間去寫日記……最近發生左既大事有１３號既六團聯團燒烤同１５號苦榮生日，仲有１８到２０號ＪＰＣ既CAMP。p>
今次個ＣＡＭＰ講真真係覺得有Ｄ無聊加無奈。無疑呢個ＣＡＭＰ係幾多素材提供，但係佢個名好明顯改錯左，因為呢個「領導訓練營」絕對似一個野外活動營。日又行山夜又行山，然後訓覺又訓帳幕同訓山邊，都真係幾攪野。雖然好頂唔住頸有Ｄ人既態度，不過都好開心，因為今次都識到幾個朋友仔，仲多左個阿媽添∼！ ^^ 本來最後一日要出去講下對呢個CAMP
既感想，麗文同我都好想講下Ｄ不滿既野出黎，不過最後俾阿媽勸我唔好講囉……去完CAMP，即晚同牛牛、崔峰＆叡叡去游水，玩到好倦呢∼
到左今朝，本來七點半就要去到普愛小學做ＳＰ，結果我唔知醒起身，好彩都趕得切八點鐘去做主持。話晒假假地都係城南ＭＣ王，我雖然唔知清楚個
RUN DOWN，不過都足以做得好好睇睇，引班小朋友笑既∼ 上到班房玩分組遊戲都玩得好開心，真係好想快Ｄ到聽日，可以再去同佢地玩呀∼！完左ＳＰ，開完Ｅ之後，我地１１７既人同豬媽就去麥記食
LUNCH，之後我就同崔峰去深水埗行街，又去左佐敦，仲買左兩個FIGURE
添∼！開心到震呀∼∼∼∼∼
返屋企食完飯，同（親生既）媽咪傾左好耐計。我覺得我同我老豆都好幸福，有個咁好既人做我既媽咪真係好好，又識諗、又靚、脾氣又好、又識做人處世，如果我第時有個咁好既老婆就好啦……雖然同媽咪傾過，不過我仲未可以完全原諒我老豆，因為我最憎人講一套做一套，仲要將Ｄ事講到責任響人地度咁。明明係佢自己唔做我幫佢做，之後又要一開口就鬧我，平時仲教我要平心靜氣。講就天下無敵，呢Ｄ就係所謂既大人……我話過起碼一個星期唔會同佢講野，而家仲有三日！
2003年 07 月 09 日 星期三 【晴】
差唔多一點鐘，我同細囡囡HEIDI、好徒兒笑笑、仲有關邦同JIMMY
去左NEWAY CITY
唱Ｋ，臨走仲撞到鮑鮑∼！可惜我要同佢地上HEAD，唔係既話實走返上去同鮑鮑再唱過∼！上左HEAD，同崔峰攪佢地ＳＰ既道具，又同練ＮＣ班朋友仔，即係牛牛、LION、鋥溦、小婷等等傾左兩句，仲睇左阿桃班MEMBERS
操左陣先走。五點幾我同崔峰過到去金鐘，同好耐無見既四仔＆阿田會合，然後同蘇九妹一齊入赤柱買野食。今晚仲有PINKY、蕉LING、峰少、傻鴨、濠哥、家華……
一班接近同期既朋友仔一齊邊玩邊ＢＢＱ。好開心可以再見到佢地，而且令我記返起好多當年既開心事……
今晚係第二晚響沙灘睇星。雖然今晚既星空好靚，但係個感覺好唔同。可能因為今晚係企響度睇掛……不過我始終覺得，尋晚睇星既感覺好Ｄ……
＊ 茫茫然在數星星，天際多麼平靜……
ＰＳ：皇上，知你掂啦∼！高考成績考得咁好，恭喜晒∼！
2003年 07 月 05 日 星期六 【晴】
２：３０係８７班新會員既宣誓典禮，好開心可以睇到佢地終於宣到誓，其中除左我有份幫手教既會員之外，仲有我既好阿妹同好徒兒添∼ 當然，我既囡囡同佢既七姑姐都好叻，做司儀做得幾好，只可惜我好快就要走，因為要過港島總部排話劇。今日之後，都唔知幾時先可以再見到佢地啦…
聽日就係太陽計劃既大日子，今日就要做最後彩排，好開心因為今次做得好過上次好多，個個都有板有眼∼！仲玩得好開心添∼！彩排完我地三母子同嘉豪、TRACY
就過去黃埔食飯傾計，傾左好多野，有開心既又有嬲既。雖然紅記既朋友仔聽日會去沙灘游水，睇唔到我地既表演，不過都唔緊要，因為佢地都恨左游水好耐，就好似我一樣∼！ ^^
ＰＳ：最近幾日都好夜返，所以無寫日記，而家都已經係1:41AM，我將呢幾日既生活照都POST左上
http://www.pbase.com/blackwork2
，大家得閒可以上去睇下架∼！ ^^