|
今朝好早有人打電話黎~好似七點幾就有人搵我媽咪~ 跟住到9點幾, 個門鐘又自己發神經...猛咁響~ 激死我啦~ 到12點幾, Athena打電話黎呀~~ ^_^ 約o左聽日1點o係地鐵等~~ 好開心呀~~ 計下計下~都好耐冇見lu~ 哈哈~今晚大家玩得開心d啦喎~~~ ^o^ |
|
2000年最後的一天... 現時的心情, 是很安定... 我應該...找得到一點自己的幸福吧... |
|
今日好開心呀~ ^_^ 成日心情都好好~ 對住佢, 再冇以前好悶o既o個種感覺~ 真係好啦~ 又係o個兩個字~ 係"認真"o架~ 睇o左"薰衣草"... 都幾好睇~ 但係冇想像中咁感動~ 哈哈~ 一路睇~ 一路凍~~凍到我死~ 今晚o既時間過得好慢~ 行o左好耐都仲係好早~ 不過...我一d都冇覺得難過, 反而仲幾好~ 我希望我o既感覺一直維持到落去啦~ 到搭地鐵返屋企o個時, otto打電話比我~ 我feel到佢有d野想講~ 唉...千奇唔好比我估中呀~ 我好驚o架~ 以前係咁, 將來都係咁~ 兩個唔同o既地方~ 感覺好難hold o架~ 又或者, 唔係我所諗o既咁~ 哈哈~ 最好係我諗錯啦~~ |
|
今日係Becky生日呀~~生日快樂~~ ^_^ 昨晚好乖咁, 12點半就off o左 line~ 跟住打電話比人~ 點知人o地出o左街, 激到我有少少嬲嬲o地~ 又話唔出~ 結果又呃我~~v_v 跟住我就訓覺仔lu~ 今朝晨早起身去睇醫生~ 好眼仔訓呀~ 拎住好多card board返學, 搞到要拎portfolio袋~ 重到死~~ 唉...都唔知做咩咁邪惡~ 我搭van仔o既時候, 見到Danky~ 都唔知點解佢竟然會o係我屋企附近出現~ 咁我當然係扮睇唔到啦~ 總之, 好唔知點咁... 上堂, 又無聊到死~ 因為係最後一堂書刊啦嘛~ 下個星期~ 又唔知上咩堂呢~~ 哎呀~ 今日apple話o左樣野比我聽~ 令到我覺得好恐怖呀~ 就係apple昨日燒野食o個陣~ 有一班人捉o左隻流浪貓黎燒~ 格硬用報紙點火燒死佢~~>_<" 好殘忍呀~ d 人咁衰o架~ 人o地係流浪貓已經好慘o架啦~ 都冇人性o既~~~ 聽日就倒數啦~~ 基本上, 就一定出去玩o架啦~ 冇理由留o係屋企o架~~ 諗住叫埋Athena出黎~ 但係佢約o左Polly lu~~ anyway~ 都唔緊要o既~ 睇下聽日阿程去邊啦~ 如果佢有地方去~ 咁就即係唔洗我陪佢啦~ 唉...不過宜家仲未決定好~ 可能照番原訂計劃, 同apple gary去倒數~~ 哈哈~ ^_^ |
|
如果能夠陪我渡過到我o既生日~ 我估我會作出一d改變~ |
|
或者習慣o左去依賴~ 所以...就連個幾鐘頭o既時間, 都覺得太長~ 我變到好似好冇耐性咁tim~~ 今次, 我諗我真係認真啦~ |
|
雙魚座的人~ 原來係一條玻璃魚... 佢好易受傷...好需要人安慰同關心~ 呢d~就係雙魚座o既特質~ 哈哈~~講得一d都冇錯~ |
|
藥我已經食哂~ 但係仲未好返~ 本來諗住去睇醫生o既~ 不過原來今日只係開到1點~ 所以冇得睇~ 要等聽朝先睇~~v_v 唉...又要晨早起身~~ 好慘呀~ |
|
原來發覺, 今個星期, 我只是留在屋企吃過一次晚飯~ 很久沒有試過這樣晚晚出去玩了~ 今天, 沒有外出~ 很無聊的在家做著無聊的事. 雖然是無聊一點, 但總算是有足夠的休息... 昨晚傾電話傾到2點, 很眼訓啊~ 要不是等頭髮乾, 我一早就睡著了~ 那當然, 我傾得很開心~ 有一種說不出的感覺, 是大家作出的遷就? 還是我的感覺變了, 所以換來的態度, 也好了很多呢? 到最後收線的時候, 我心裡的確肯定了一些以後從沒有肯定的事. 我想, 我是認真了吧~ 死火~ 昨晚應承o左細佬打電話俾佢~ 都冇打到~ 我又實比佢鬧都似~~v_v 哎呀~ 仲有呀~ 昨日全日都冇見過楠楠~~ 哈哈~唔知佢有冇曳曳呢~ 仲仲有~ 我唔記得o左去買糖糖比棠棠食~ 吾~ 牙齒當金洗~ 我一定會去買比你食~ 費事你話我冇信用~ 唉...尋晚有人好夜打電話比我~ 我見到係佢打黎~ 我完全冇諗過聽~ 好煩呀~~ 希望佢知道咩事啦~ 仲打電話比我~ 已經冇意思啦~ |
|
昨晚好安心咁訓覺~ 今朝亦都好早醒o左~ 冇平時咁趕~ 今日好開心呀~ 放o左學, 食完lunch~ 行o左一陣~ 就去o左唱k~ 由3點唱到7點幾~ 勁唱"放煙花"同"大日子"~ 哈哈~"放煙花好似唱o左成5, 6次都有~ 都癲o架~ 唱到失哂聲~ 冇咩氣~ 唔洗問~ 喉嚨就勁痛啦~ v_v 出番黎~ 跟住食o左少少野~ 就去o左會展睇雪啦~ 唉...可以話係"廢"o架~ o個d所謂雪, 其實就係泡咁~ 咁諗住入去睇表演會好d啦~ 點知...都一樣係好唔掂~ 都唔好玩o既~~>_<" 比佢呃o左... |
|
到最後, 我講o左... |
|
過o左12點, 雖然我見到佢online~ 但係我都冇講~ 心態上仲係好驚... 因為我知我唔係一個安定o既人... |
|
Love begins with a smile, grows with a kiss and ends with a tear. The brightest future will always be based on a forgotten past, you can't go on well in life until you let go of your past failures and heartaches. |
|
好~ 比多次機會自己~ 如果今晚見到佢online! 我就同佢講~ 如果唔係~就算數~ |
|
玩o左幾日, 聽日終於都要返學啦~ 哈哈~如冇意外~聽晚會去灣仔睇雪~~ yeah~~ |
|
有人同我講, 佢每日都習慣o左黎呢度睇我寫o既日記. 不過唔知點解~ 咁樣我反而有d驚~ 因為...我估我o係度寫o既野~ 更加會有避忌... 有好多野~ 我都想指明道姓講~ 但係, 我怕睇o左o既人會多心~v_v 唉 |
|
到目前為止, 我仲未點起過阿聰送比我o既火柴... 我諗, 我可能已經放低o左... 既然我24號能夠唔去搵佢~ 咁即係話, 我呢2年, 可以真係唔會再諗... 吾...應該係好事黎o既~~ |
|
你隻手, 同以前一樣, 都係咁凍... 因為凍o既感覺從來都冇離開過我~ |
|
當我肯定唔到個結果o既野~ 我諗, 我都係唔會做... 費事搞到咁冇意思啦~係咪? |
|
我昨晚訓覺o個時, 又o係度諗, 究竟我講唔講好呢?? 真係好想打電話比佢, 話佢知我宜家點諗... 但係...佢仲會唔會回頭? |
|
哈哈~昨晚真係好眼訓呀~ 打完邊爐, 就訓o左一陣~ 到o左10點幾, 就起身玩icq, 玩到點幾又再訓過~ 今朝11點幾就醒o左... 但其實, 我諗我仲可以再訓囉~ 嘻嘻~ ^_^ 起o左身, 食o左少少野~ 咁我就打比個朋友~ 問下佢係咪真係出黎啦~ 點知佢又係玩到死死下~ 想休息下~ 咁咪算囉~ 唔緊要啦~ 休息下仲好~ 過o左聖誕, 我諗我個網頁版面都係時候換下~ 於是我就係咁畫...畫...畫... 畫o左個2001年o既version~ 哈哈~今次幾滿意~ 因為以咩都冇~冇flash, 冇動感, 冇音樂黎計~ 個效果算係唔錯o架啦~~ 各位就"張就"下~ 唔好要求咁高啦~~ ^_^ |
|
我好似有d後悔...點算? |
|
我其實係o係度妒忌緊, 定係唔甘心? 我寧願自己係唔甘心~ 因為如果係妒忌, 我會好討厭我自己~ 但如果我係唔甘心~ 我覺得...會令自己好過一d... |
|
鐘意過o既人...個"過"字, 本來冇咩野~ 但係突然o係我o既眼中, 顯得特別唔順眼... 其實...真係有野想講~ 我知我唔講~ 我起碼會有成個星期down down o地~ 但似乎再講~亦都冇意思... |
|
又係因為冇野做~ 所以update icq list o既info黎睇~ 其中阿維o既info令我好深刻~ I thought i can, but i can't. I thought i will success, but i didn't. I thought i love her, but it is just a illusion. I thought she is unforgetable, but that she is not she anymore.............. 將個she字換o左係個he字~ 同樣代表o左我o既心情... |
|
好快行完街返黎~ 哈哈~ 都有少少收穫~開心開心~ ^_^ 但可能我太累~ 食o左d藥~ 有d眼訓~ 所以行行下~ o係度發脾氣~ 真係曳曳啦~ v_v 冇野做~ 於是我就拎番今年收到o既x'mas card出黎睇啦~ 好多...都令我好感動... 多謝哂你o地~ |
|
期望你忽然悟覺之時 仍未太晚 期望我忽然後悔之時 仍未傷得太深 其後淡然習慣 即使不希罕 陪掉時間 我總有天氣屢心淡 用你飄忽的好意 換我最難忘一次 是我愛上浪子 不可以 獨個令你心怡 用我青春押一注 換你回頭停留是處 只想你到最後 心中會內疚 還後悔付出的愛不夠 用我冀盼的雙眼 換你偶爾來一晚 用我無窮容忍 姑息你 但你視作等閒 如何自處 怎麼我今次 願意孤擲一注 為何可以 拋發了一切 為你一人 自棄森林 任性一次 |
|
今日本來諗住大昏迷~ 但係最終都係唔夠12點就起o左身~ 因為媽咪拍醒我, 問我今日有冇街去~ 佢話如果冇, 就陪佢去行街~ 下~~又行~ 我已經行o左兩日啦喎~ >_<" 好好好~去就去~ 橫掂都係累~ 唔差在累多少少~~ 嘩~ 真係好唔掂~ 好鬼頭痛~ v_v 不過冇計丫~ 藥就食o左~ 佢要痛~我都冇辦法~ 聽講~ 今晚好似打邊爐喎... 大獲~ 我喉嚨痛~ 仲打?? 死火... 似乎~我冇得揀~ 我費事話比佢o地聽我喉嚨痛啦~ 因為難得可以成家一齊坐低食飯~ 所以...死就死啦~ |
|
今日boxing day~大家拆o左禮物未呢?? 我通常就唔會等boxing day先拆~ 一收到就會拆~ 哈哈~等唔切丫嘛~~ ^_^ |
|
如果當我唔再send e-mail比人~ 你估...有冇人會自動自覺send mail比我丫拿? 答案係可以肯定~ 係冇~v_v |
|
其實每一次行尖咀, 我都會諗起一個人~ 因為o係o個度, 有好多同佢一齊o既回憶~ 我昨日見過佢~ 心入面...好似有d野想講~ 但係...最後我話夜d打比佢~ 佢飛o左留言~ 昨晚唔講~ 之後, 我都唔會再想講~亦都唔會再諗... 變o左就係變o左... 我唔係以前o既我~而佢~亦都唔係以前o既佢~ |
|
行尖沙咀海旁~真係凍到死~ 望上去個天~ 見到一粒星星~ 跟住阿yan就唱o左一句"天邊一顆閃星星~海邊一顆閃星星..." 搞到我又即刻諗起d 野~ 唉...係咁o架啦~ 大時大節~ 我諗起佢~都唔係過份o者~ |
|
昨晚返到黎點幾兩點~ 玩o左個零鐘icq, 成3點幾先訓~ 但係我訓得一d都唔好~ 成日都諗起一d人...搞到我好煩~ 我其實一d都搞唔清楚自己o既心意~ 不過叫我安定落黎~ 我又好似冇o左d寄託咁~ 唉... 唔知可以點做... 今朝十點幾起身~ 好忙咁搞掂哂d野~ 就打長途電話同阿聰講聖誕快樂~ 播o左首x'mas板本o既"夜還未深"佢聽~~ 傾o左一陣~ 我又要出街啦~ 約o左阿wing12點幾o係荃灣等~ 跟住再搭車去屯門阿yan屋企玩~ 打下麻雀~食下野~6點幾鐘~我o地又出o左去行啦~ ^_^ 哈哈~由屯門搭輕鐵去元朗, 係咁行...行...行~ 終於, 我o地搵到B仔記涼粉食~ 再跟住~我o地又去o左尖咀行~ 嘩~原來發現兩日連續行同一個地方~ 都幾"囉"命~ 又多人~又迫~v_v 不過好開心呀~ 因為我o地見到好多警察~ 基本上, 我o地今日睇警察仲多過睇燈色~ 望下邊個警察靚仔丫嘛~ 都睇到不知幾開心~ ^_^ 但始終~冇一個及得上430咁靚仔~ 哎呀~有樣野~好緊要o架~就係...430原來姓方o架~ 哈哈~又知多d佢o既資料啦~真開心~ 到o左11點幾~ 我真係頂唔順~ 條腰骨好痛呀~ 所以就走人lu~~ 返到屋企~都係12點左右~ 唉~~又玩o左成半日先返... anyway~~今日好happy~ 同阿wing and 阿yan一路行~一路傾~ 講o左好多搞笑野~ 笑到我o地死~ 話咁快~ 又過o左個x'mas~ 再過幾日~ 又新年lu~ 即係話...今個星期, 差唔多日日都要出去~ 聽日, 我諗我都要休息下~ 叉足電先再玩過~ yeah~ |
|
做一個明智o既決定係好難~ 我揀a, 我就會折磨我自己~ 我揀b, 我又會對唔住另一個人... 唉~~ 比d時間我... |
|
返屋企之前~我打o左個電話... 打唔通~飛o左去留言~ 有少少失望~ 我話o左會夜d搵呢個人~比d野佢做~ 但竟然... 似乎係天意~ |
|
o係旺角行去尖咀o既途中~ 我經過我o既死穴...一度有我美好回憶o既地方~ 可惜景物依舊~人事全非... |
|
今日6:30約o左班friend出黎~ 哈哈~~kathy都黎o左呀~~ ^_^ 我諗最開心o個個, 都係阿輝啦~~ 食完好美味o既"賴尿蝦"...就一直由旺角行落去尖咀~ 再搭船去返灣仔, 跟住行路去銅鑼灣~ 最後我o地去o左shooters飲野~ 好開心呀~~ ^_^ 玩到痴哂線~ 咖哩直頭好似小丑咁...做我o地o既娛樂先生~ 今年比起上年~真係開心o左好多~ 希望下年會再開心d啦~ |
|
好耐都未試過即興搵人出黎~ 仲要係話出就出~ 不過都好...呢個人都好耐冇見過... 佢真係變o左~雖然我把口仲係話佢冇咩變... 有好多野~原來真係錯過o左就錯過o左... 其實...如果...有可能...唉~ 都係冇野啦~ 機會係自己放棄...都係算啦~v_v |
|
其實今朝起身~ 我真係有諗住去大圍join阿立仔同阿楠去燒野食~ 不過, 我成1點鐘~都仲未搞掂d野~ 所以...都係冇去到~~ 哈哈~佢o地都唔會失望o架啦~ 多我一個唔多~少我一個唔少~ 個死人阿楠話...唔去咪仲好~~ 唔好以為我聽唔到~~~我聽得好清楚o架~ 我實記住你~ 哼~ 下次先再玩啦~ |
|
原來最重要o個樣野唔記得o左同大家講~ ...就係... ~MERRY CHRISTMAS~~ 願大家有一個快樂o既聖誕節~ ^_^ |
|
又係時候...拎番伊健隻cd出黎~ 原因係...又到聖誕啦嘛~ 有一首好應景o既歌好岩聽o架~ |
|
死啦~~我個病嚴重o左~ 由唔喉嚨痛~ 變到宜家痛埋~v_v 傷風又仲未好番~ 今晚點食正野呀???? 算啦~ 死就死啦~~食o左先算~ 再唔係, 食完再睇多次醫生咪得囉~ 哈哈~ |
|
昨晚我點幾就訓o左啦~ 基本上, 我一d都唔眼訓o既~ 但係我daddy mummy見我個病仲未好返~ 我就比人鬧, 話我咁夜都唔訓啦~v_v 終是死死氣, 格硬迫自己訓~ 唔知點解, 次次早訓親, 都唔方會有好野發生~ 結果又搞到我發惡夢~ 個夢係o係戲院發生o既~ 我睇睇下, 隔離o個個人突然話睇得唔清楚, 咁就望住佢, 聽佢講野啦~ 望望下, 佢個樣直頭變哂~ 咁我即刻望番個銀幕啦~ 發現個畫面變哂藍色o既鬼樣~ 嚇到我死~ >_<" d人立即起哄啦~~亂咁走, 亂咁叫... 但係, 有一個女人, 應該係話妖怪先岩~ 佢一見d人想走出戲院, 佢就伸長條"利"圈番d人入黎~ 哎呀~好恐怖o架~~ 跟住我就嚇醒o左lu~ 我記得, 我有一次都發過類似o既夢~ 我諗起一樣野, 兩個夢o既相同之處就係... 佢o地兩套都係日本出品o既電影... 我記得變畫面之前, 出現過一個"乜乜珠式社"o既logo~ 真係好驚驚呀~~ 睇番個鐘, 都係六點幾~ 個天都仲未光~ 結果, 我用張披"come"埋個頭先敢再訓~~ 唔知呢個夢, 想比d咩暗示我呢?? |
|
我記得...我自己都好鐘意食湯圓o架~ 不過就唔係成日食... 我諗, 我係鐘意食湯圓o既o個種背後意義o掛~ 團圓團圓... 丫~~唔知邊個諗出黎o既呢~? |
|
唉...如果要揀首歌, 係能夠令我"腰心腰肺"... 我諗, 我會揀...自欺欺人... 本來, 都有一排冇聽o架啦~ 但係阿楠幫我燒o左隻cdr... 搞到我又聽番... 問我宜家o既心情係點? 我估...係落寞o掛... 唉... 結果...整喊o左我... |
|
今天上堂無聊~我o地一班女仔o係度睇雜誌~ 本雜誌咁岩講掌紋o既野~ 咁我o地咪o係度學睇~ 你又幫下我睇~ 我又幫下你睇~ 丫~原來我條事業線好長~好直~ 咁即係話我事業好好丫? 定係話我做死一世呢?? 哈哈~ |
|
唉...仲有幾日先月尾... 點捱呀...v_v |
|
昨晚收到好多電話呀~ otto打黎同我講good night and 叫我記得食藥~ 棠棠玩玩下icq, 又話打黎~ 我仲以為佢係講笑tim~~~ 點知佢真係打黎~~ 傾o左幾句就收線~~~ 不過我好開心呀~~ 如果有多d好耐冇傾o既人打比我~ 我諗我會仲開心d tim~ 你o地對我真係好~~ 呢個聖誕我feel到好warm~ 多謝哂你o地~~ ^_^ |
|
Dennis終於都有時間去拎我寄比佢o既野啦~ 哈哈~好彩~佢都鐘意o者~~ ^_^ 咁我都放心d... |
|
本來有d野寄比人~點知...有阻滯~ 竟然放唔入郵筒~v_v 有冇搞錯~ 等我仲滿眶熱誠拎去寄~ 激死我啦~ |
|
有一樣野~好得意o架~ 有d似你... 哈哈~ 睇見都想笑~ |
|
丫~ 我發現我成鬼日都受阿哥影響~ 我鐘意o既野~ 鐘意聽o既歌~ 唔多唔少都會受到佢影響~ 咁樣~ 唔知係咪好事黎o架呢~~~ 不過好彩...佢鐘意barbie, 我唔鐘意o架o者~ 唔係就係邪惡啦~~ 雖然佢買番黎d barbie真係好靚同好貴~ 但比著係我, 我就唔會揀收藏barbie囉~ v_v 我會揀收集一樣好普通, 但又對我有好大意義o既火柴~ |
|
今日返學~ 收到阿wing, 阿mon 同埋阿yan 張card~ 佢o地o係張card度都寫o左好多野~ 收到好開心~~ 當然...我要特別多謝阿yan啦~~ 佢送o左"桐"好大"桐"o既萬樂珠比我食~ 睇黎~ 有排先食得哂~~~ 哈哈~~ 想整肥我都唔洗咁呀嘛~~ 你生日, 我識做o架啦~~~ ^_^ |
|
返到屋企收信~ 哈哈~ o係咁多封信入面~ 有2封係我o架~~ ^_^ 一封係Athena寄比我o既~ 另一封係楠楠o既~ 佢真係冇呃我~燒o左隻碟比我~~真係開心啦~ 仲有埋card~ 仲有字~ 開心~~開心~~ ^^ 當我打開Athena張card, 見到入面有好多字~ 一邊睇~ 一邊有d眼濕濕~ 我真係眼淺啦~ v_v 我又再一次o係佢身上, feel到好好朋友o個種感覺~ 好感動呀~~ 我...其實好掛住你o架~~ o'.'o 下星期有時間~ 出來一眾~ |
|
今日好累呀~ 可能係因為太耐冇行過街啦~ 旺角真係多人到死~ 仲要成日比人踩~可憐~v_v 隻腳有少少抽筋tim~~ 同阿wing and Apple行o左好耐~ 我終於都買好聽日同朋友仔交換o既禮物~ 不過~我應該仲有人係未買o架~~ 算啦~~遲d見到佢先買比佢啦~~ 唉~~我決定o左...我都係唔去搵阿match~ 搵黎都冇用啦~ 我o係旺角返屋企之前, 本來o係金鐘落車o既~ 但係我結果都o係銅鑼灣落車~ 去o左商務買o左本書... 書, 我就買o左o係度, 但諗o左一陣~ 都係算啦~~我拎到去佢屋企又點丫~ 話o左兩年就兩年~ 唔准再諗佢啦~~ |
|
我好頭痛~ 我一諗起你我就頭痛~ 感覺好辛苦~ 唉... 今晚好煩~ 想有個人tum下自己~ |
|
今日好凍呀~o'.'o 好有節日feel~ 哎呀~我仲未去買聖誕禮物~ 危險~ 聽日一定要去買先得~ ^_^ |
|
呢兩日都成日訓~ 所以都好精神~ 10點幾就起身啦~ ^_^ 今日做o左一陣功課~ 就落街收信~ 哈哈~收到今年o既第三張card~ 係棠棠送o架~ 真開心~ ^_^ 哎呀~ d 功課好唔掂呀~ key o左d heading落d 對頁度~ 睇落去又好似好細~ 但整大d, 又好似好核突咁~ 唔知點算~~v_v 唉~~睇黎~ 下堂要再改多次先交~ |
|
覺得自己有少少失敗~因為我寄o左咁多張card出去~ 我到目前為止, 只係收到2張x'mas card... 係我人緣差丫~ 定係d咩呢? |
|
今日第二批人應該會收到我o既x'mas card~ 唔知d card寄到o係佢o地手上, 有冇甩皮甩骨呢? |
|
我終於同o左阿match個nf講o左我點解add佢~ 個心都安樂d~ 我費時又引起更多誤會啦~ |
|
可能我近來玩得icq實在太多啦~ 搞到我發夢都夢到自己o係度玩icq~ 哈哈~ 我真係有d過份~ 係咪要收歛下呢~~ |
|
我個病"偶"o左成個星期~ 終於o係今朝睇o左醫生~ 成8點鍾我就起身去睇啦~ 都唔知咁早去做乜~ 不過冇計~ 比人迫去睇醫生~ 媽咪一定要見到我起身, 佢先肯出門口~ 因為佢驚我唔肯起身, 唔去睇醫生嘛~ 睇完返黎~ 食o左藥~ 又真係好o左好多~ 我諗起碼今晚訓覺o個時冇咁辛苦o掛~ 哈~ 有人冇聽到我電話~ 我話o左後果自負o架~ 我唔係講笑~ 你死梗啦~~哈哈~ |
|
我今晚重覆咁聽特別版o既天氣報告~ 真係冇停過~ 佢一send 比我, 我收o左o個個file開始~就聽到宜家~ 宜家已經係點幾啦~~ 哈哈~ 一把本來好陌生o既聲~ 到o左宜家~ 已經變o左一把好熟悉o既聲lu~ |
|
今晚同otto傾o左一陣~ 佢第一句就問~ 楠楠係邊個? 嚇到我死~ |
|
"Contentment"is not the fulfilment of what you want, it is the realization of how much you already have. |
|
昨日加藤同我講~ 佢話我好有勇氣, 夠膽同大家講我做過第三者呢個經歷~ 其實, 我當時就係做佢同男朋友之間o既第三者~ 哈哈~ 但係宜家3個人仲有計傾喎~ 係咪好奇怪呢? 我自己都覺得怪~ 因為對住加藤, 始終都有少少對佢唔住o既感覺~ 所以, 宜家我時不時, 都會o係佢o地背後默默做一d野~ 令佢o地o既感情更加好, 更了解對方~ 我真係好希望佢o地會永遠一齊~ 如果佢男朋友對佢唔住~ 我實會撐加藤o架~ |
|
翻查字典, 原來"情"字的解釋是... 感情, 情緒, 外界事物所引起的愛, 憎, 愉快, 不愉快, 懼怕等的心理狀態. 而"愛"字的解釋是... 喜愛, 對人或事物有深摯的感情. 在階級社會中愛是有階級性的. 估唔到, 愛情原來真係包含o左"憎"呢樣野~ 我以為係d小說家空口講白話~ 但...其實係有根有據o架喎~ 至於階級觀念呢個問題~ 我又覺得有d問題~ 愛, 乜唔係冇階級之分o架咩~ 唔通一個人窮, 就冇資格去愛~ 唔通一個有錢人, 唔可以愛上一個窮家女? >?< |
|
每一個人都有自我安慰的能力~ 喜歡把事情想得美麗一點~ 讓自己好過些~ 我就是這樣一個能把這種能力發揮得淋漓盡致的人~ 但從另一個角度睇~ 即係呃自己~ 唉... 我太易受傷害吧~v_v |
|
十二月二十四號o既早上, 又或者夜晚~ 我諗我又會從踏上年二月八號去過的地方. 將會跟上次一樣, 帶著一本書去... |
|
今日成日都發自己脾氣~ 我比電話煩住我...真係唔知點算? 成日避唔係辦法... 我諗我要解決o左佢先得~ |
|
昨晚比平時早o左訓~ 2點半唔夠就訓o左~~可能太多野做啦o掛~ 基本上, 我今日唔洗返學~ 照計我唔會咁早起身~ 9點幾就起o左啦~ 哈哈~ 咁係因為阿聰打長途電話比我同我傾計嘛~ ^_^ 傾傾下~ 又傾o左個幾鐘~ 真係開心啦~~~ |
|
今晚成晚, 都好忙~好緊張~ 本來想寫手寫日記o架~ 但...似乎都冇時間寫~ 兩日冇寫日記...好多野都要記番低~ 我怕自己唔記得~ 因為發現近來記性差o左~ |
|
阿match昨晚冇啦啦send message黎問我做緊咩~ 我差d以為自己睇錯~ 我話我病緊~... 佢同番我講~ 叫我休息多d~ 哈哈~真係開心啦~ 當然, 我都想休息多d~ 不過要得先得o架~ v_v |
|
昨晚同立仔玩icq phone~ 但係因為我都冇咪, 所以都玩唔到~ 得個聽字~ v_v 咁我今日返屋企之前, 就特登去買o左個咪返黎玩~ 點知~ 整極都整唔到~ 心情好沮喪~ 宜家...雖然係有d起色~ 不過d聲依然錄唔係幾到~ 究竟係我o既問題~ 定係個咪o既問題呢? |
|
今個聖誕~ 我前後加埋, 印o左兩批聖誕card~ 第一批係圓形o既造型~ 第二批係正方形~ 總共加埋應該有30幾張~ (oh~好似懶係多朋友咁tim~哈哈~~ ^_^) 雖然正方形o個款我今晚先印~ 但係我已經好有效率咁寫哂~ 聽日可以寄得~ 哈哈~ 不過cut完好多card board之後, 隻手就黎斷咁滯~ 真係可憐~v_v |
|
其實呢兩日, 都有d事發生o左~ 但係...我又唔係好記得發生o左d咩喎~~ 記憶好模糊~ 死火~ 唔通有d老人癡呆~ 哈哈~ ^_^ |
|
有一個問題~ 想搵人幫手~ 但我又唔想陷人於不義~ 所以, 算啦~ 個問題自己解決~ |
|
今日黑仔到暈~ 我先頭諗住去打壁球o架嘛~ 點知放o左學, 食完野, 去到book場o個時, o個個人竟然話比我聽佢o地今日要清場~ 激死我~~v_v 搞到我又要行一條好長好長o既樓梯返屋企~ 差d斷氣~ |
|
去靜修, 唔係一件容易o既事~ o係o個7日入面, 你會領略到好多野~ 我諗我o既人生會因為o個7日而有所改變~ |
|
我會盡快搵7日時間去靜修... |
|
今晚有d想喊... 整喊我o既人, 心知肚明係咩事... 好好反省下. |
|
阿哥今晚心情幾好~ 坐o係度, 同我仲有daddy傾計~ 講o左好多野~ 估唔到, 發生o左咁多事~ 我daddy仲係覺得我係細路女~ 哈哈~ 聽見佢講到出口~ 我真係有d想笑~ 其實, 我已經大個女o架啦~ 小朋友? 我唔係啦~~ ^_^ |
|
其實昨晚, 已經想寫一d關於第三者的東西~ 不過寫到一半~ 都係delete o左... 今晚, 我覺得始終要寫番出黎~ 原因係, 我覺得某一個人唔應該做第三者, 佢應該會有一個更好o既選擇~ 第三者o既感受~ 唔洗講都知, 一d都唔好受~ 偷偷摸摸, 做人後備, 你會覺得開心咩? 每一個人, 都有自己o既價值~ 唔通, 你o既價值, 只係夠做人o地o既第三者咩? 雖然做第三者, 感覺係會好刺激~ 但係, 唔係個個人都玩得起~ 當你踩o左隻腳入去~ 你就會好痛苦~ 因為你o個時, 根本都已經迷失o左自己~ 我曾經有一次, 都試過做第三者~ 當然, 我冇成功咁搶得到呢個男仔~ 不過, 知唔知點解我會鐘意呢個男仔丫? 可能, 就係因為佢對佢女朋友夠專一~ 所以我不知不覺咁鐘意佢~ 我宜家最鐘意o既貓貓, 都係佢帶入黎我o既生命o架~ 唔能夠同佢一齊...可能, 係一個遺憾~ 但係, 我好開心冇同佢一齊, 因為佢同佢女朋友好幸福~ 自己得唔到幸福o者~ 見到人o地幸福都會好開心~ 呢d就係我宜家o既心態啦~~ ^_^ 人係貪心o既~~ 有齊人之福享~ 實來者不拒o架~ 總之一句講哂~~小心d啦~ |
|
哎呀~ 死火~ 有d寄去外國o既聖誕card~ 我仲未寄tim~ 又未寫~~~ 點算好?? 宜家先寄, 睇怕都寄唔切o架啦~ 但係...好似好冇良心咁...v_v 寄定係唔寄好呢? |
|
昨晚又成兩點幾先訓~ 玩鋤大dee 嘛~ ^_^ 我竟然贏喎~ 真係多謝佢o地讓我啦~ 今朝訓到十點幾, 叫埋阿楠起身~ 哈哈~ 因為上次我叫o左佢, 佢都冇醒~ 所以, 我叫佢o係半個鐘頭內, 就要o係icq send message比我~ 方法好湊效~ 佢果然有即刻起身~ 跟住, 我o地又玩o左成個幾鐘icq... 唉~~我近來似乎玩得太多啦~ 唔得~ 要早d訓~~ 不如大家都早d訓丫~ |
|
又畫番flash~ 但係出現o左好多問題~ 就係...有好多野, 我都唔記得哂~ 又要從新睇過本書~ v_v |
|
今日做乖女~返o左去幫daddy手睇鋪~ 見冇野做~ 咪拎埋d工筆畫功課落去做囉~~ 唉~ 畫成點?? 咪樣衰囉~~v_v |
|
好耐都冇細佬傾電話啦~ 今晚同佢傾o左個幾鐘~ 哈哈~~佢話我又變o左d~~ 寸o左~~ 冇計啦~ 近來心情幾好~ 食得, 訓得~~~ 仲唔玩~~等幾時? |
|
好憎人打機~~好憎人打機~ 好憎人打機~ 好憎楠楠打機~ |
|
我始終都忍唔住, 同o左阿match個nf傾計~ 傾o左幾句... 當然, 我冇提到我都識阿match啦~ 唉~~~ 我覺得自己好多餘呀~~v_v |
|
昨晚臨訓o既時候, 我send o左個message比阿match~ 就係"good night~ match~ ^_^" 之後, 我就好快走o左啦~ 到今朝online, 我收到佢o既message~ 就係"ok"... 雖然只係得ok兩隻字~ 但係我已經好開心啦~ |
|
今日我終於明白到, 眼不見為乾淨呢個道理~ 唔怪得之我send request 比阿match~ 佢死都唔肯accept 啦~ 原來, 好多野~ 真係見唔到好過見到~ |
|
近來立仔同楠, 都因為夾組o既事煩~ 唉~~我都有d 驚tim~ 唔知第時到我o地做畢業功課o個時~ 會點呢? |
|
今晚怪獸問o左一個問題~ 搞到我唔知點答佢~ 佢問:"who is nam ar?" 好大o既機會, 佢係因為睇到我icq nickname o既緣故~ 所以先會咁問~~ 但係, 我冇答到佢呀~ 因為唔知點答~~ nam 就係 nam~ 佢係一個人囉~ 一個好傾得埋, 好好玩o既人~ 之不過~ 佢唔係我邊個~ 大家唔好亂諗~ 哈哈~~~ |
|
今日, 我好得閒咁...織頸巾~ 冇話特別織比邊個o既~ 總之就織...織...織... 織織下~我諗起我有一條黑色o既頸巾~ 讀中學o個時, 我織o左一條比自己, 織o左一條比Teresa~ 但係, 我今日搵極都搵唔到~~ 好唔開心呀~~ 都唔知放o左o係邊~~v_v |
|
我昨晚做o左一件好無謂o既事... 就係o係阿match o既guestbook度, add o左一個成日會o係佢留言板留言o既人, 我諗, 我add佢, 心態上, 係希望會o係佢口中得知多d阿match o既事o掛~ 不過, 我add o左佢之後, 都唔敢同佢講野~ 而佢亦都冇主動同我講野~ 其實我唔敢同佢講野, 係因為我驚阿match知道我刻意add佢d朋友, 為免有更多o既誤會或者其他事發生, 令佢更加討厭我, 所以, 都係唔出聲為妙~ >_<" |
|
今日仍然係死下死下... 起身online, 我話去睇醫生, 阿聰就問有冇人陪我去, 咁我話我只係一個人去咋~ 跟住佢就話叫我帶埋舊冰河石去, 好似佢都陪我去咁~ 於是, 我真係袋埋舊冰河石去睇醫生... 但我去到診所, 好多人... 所以, 我最終都係冇睇到, 返到屋企又大覺訓. 大約4點, 我起o左身, 落樓下收信. 噫~ 又有我o既信喎~ 真係開心啦~ 不過d字好陌生, 我冇即時認得出呢個人係邊個. 上番屋企, 先好小心用信刀拆開. 一睇, 係我對佢冇咩好感o既布甸狗x'mas card. 再睇, 原來係阿程寄比我o既... 唔知點解, 我近排真係有諗起佢~ 諗起佢以前對我有幾好~ 可能, 就黎農曆新年啦~ 下個月就係啦嘛~ 我仲好記得年初三, 我o地去睇saltimbanco, 好多野, 我都冇忘記o既~~ 當然, 你後來用我對阿match o既方法黎對番我, 我覺得好hurt 囉~ 角色扮演遊戲, 唔係人人玩得起o架~ 算啦~ 我o地唔係仇人, 總有機會見o既~ 我接受你o個句"MERRY CHRISTMAS!" 同時, 我都應該回應番你一句~ "Merry Christmas~" |
|
原本諗住只係傷風... 點知...我諗我宜家應該發埋燒... 等我仲諗住聽日去打番壁球~ 唉~~睇怕聽日都唔洗去打啦~~v_v 仲有...阿yan講o左d o野比我聽~~ 我覺得好可惜呀~~ 希望佢諗清楚啦~ |
|
其實近來不嬲都覺得差緊d野~ 因為濤濤應該返o左黎香港~ 但係佢一d消息都冇~ 究竟係佢唔想見我丫~ 定係有野忙呢? |
|
好慘呀~~ 傷風~~ 搞到我眼水都標埋~~v_v 唉~ |
|
如果我屋企可以養貓貓就好啦~ 可惜, 宜家貓就冇~~ 貓貓最鐘意食o既魚就有條~ v_v 魚魚呢幾日應該幾驚~ 因為前幾日, 媽咪同佢換水o個時, 唔小心將魚魚整o左落瓷盤度~ 好彩冇比d水沖走佢咋~ 哈哈~ 之後, daddy就話啦~ "快d去藥櫃拎d驚風散佢食啦~比佢定下驚~" 真係好鬼搞笑~ 比老豆激死~ 呢幾日咁凍~ 唔知魚魚凍唔凍呢? 如果比d暖水佢, 你估佢會點丫啦??哈哈~~~~ |
|
<戀上你的床> 每個人都有一張床, 單人床, 雙人床, 上下格床, 沙發床, 甚至是朝拆晚行的摺床. 無論是那一類, 床的存在, 就是讓你能發一個好夢的地方. 有時候, 我會很佩服一些在那裡都可以入睡的人. 靠著牆可以睡, 伏在桌上, 也可以睡... 其實, 真的那麼累嗎? 累了, 為何不睡在床上? 床, 大多數人, 都喜歡軟綿綿的. 加上一個枕頭... 這世上, 有什麼好比一張床更重要呢? 大家可有試過睡在自己家以外的床呢? 我覺得, 除了自己的床, 在那裡睡, 都會睡不好. 漸漸, 我發現到, 原來我不喜歡在別的床睡, 是因為, 它沒有了一種氣味, 一種只有能在你睡上所找到的氣味. 很多時候, 我洗完澡, 就會在床上看書. 久而久之, 床上染上了沐浴露的香味. 每次一爬上床, 就會聞到你最熟悉的氣味. 當我們累的時候, 睡在床上. 當我們病了, 也睡在床上. 當我們哭的時候, 也躲在床上哭. 床...原來是最安全最舒服的地方. 當你找不到人愛你的時候, 還是戀上你的床吧. |
|
哈哈~~收到阿yan o既好消息~ 佢竟然search到d 警察~ 有430 o既更進一步消息~ 嘩~~利害呀~~ 咁都比佢搵到~~~ 好開心呀~~~ ^_^ |
|
今日上攝影堂~ 睇o左成堂幻燈片~ 搞到好眼訓~ v_v 唉~~原本諗住佢要我o地交相o架~ 點知, 佢唔夠時間, 冇睇到~~ 真係白費哂我呢幾日落雨都去搵相影o既心機~~ 又或者...係天意叫我影過d再好d o既交都未定~ |
|
今朝出門口o個時好驚~ 因為要打一個電話... 哈哈~ 不過打完好開心~~ 放o左學, 食完飯~ 返屋企~ 就收到我呢一年o既第一張聖誕card~ ^_^ 係阿聰寄比我o架~~ 勁開心~~ 但係好奇囉~ 佢入面寫英文o架喎~ 喂~~你係咪用得英文多~ 唔記得d中文點寫呀? 搞到冇o左少少親切感tim~~~ 不過唔緊要啦~~我都一樣咁happy o既~~ = ) |
|
現在習慣了每一天寫最少一封e-mail, icq跟e-mail相比, e-mail好像好一點~ 點夠交代多一點的事情. e-mail跟一封用手寫的信相比, 手寫的信又好像好一點~ 可以接觸到那個人的字, 感受多一點他寫信時的心情~ 你...總讓我心情好一點... |
|
我近來, 好似冇再將我的精神放o係細佬身上~ 以前, 佢唔打電話比我, 我會覺得差緊d野~ 但宜家唔會再係咁...冇咩動力叫我打電話比佢~ 一來怕阻佢做野~ 二來, 都係諗住佢打比我會好d~ 佢對我黎講~ 好似陌生o左好多~ 我有好多野, 佢已經唔知道~ 以前我每一件事都會話比佢知~ 每一日做過d咩小事, 都會同佢講~ 由於太耐冇同佢傾~ 突然之間, o係icq佢問我野~ 我都唔知點答~ 因為要講o既話, 就要解釋好多野~ 我又懶~ 唔想打咁多~ 所以, 距離好似越黎越遠... 我唔鐘意呢d感覺, 咁即係... 我係咪時候keep番同細佬o既感情呢~? 仲有佢又話想紋身, 又話想穿多幾個環o係身上~ 唉~ 我都唔知佢呀~ 總之覺得唔係幾好~ 一來好驚佢敏感~ 二來, 佢係個幾貪靚o既人~ 好怕佢貪出個禍黎~ 希望佢會諗清楚啦~ |
|
昨晚o係icq, 同阿jo傾o左一陣~ 雖然係好短時間, 但係都分享o左好多野~ 我o地同樣的執著...總讓人覺得又愛又恨~ |
|
大家有冇發覺, 我o係呢度, 成日都寫埋一d好瑣碎o既事? 交代一d冇人會睇得明o既野? 好大部o既原因, 係因為我覺得, 一點一滴o既小事~ 都係生活o既一部分~ 有d人, 從來都唔會留意到生活上o既細節~ 但從中, 我是想提醒我自己多d留意身邊o既野~ 你就會發現到...更多的生活意義~ |
|
昨晚, 阿哥夜返...食完飯~ 佢叫我幫佢洗碗~ 佢話好累喎~~v_v 佢真係好邪惡o架~~ d水唔凍o個日, 都唔搵人洗~ 搞到我洗完碗, d 手指好似變哂雪條咁~ 多得佢唔少~ 聽講, 佢呢幾晚都會夜返~ 趕project之類d咁o既野啦~ 咁即係話...... 唉...唔制呀~~>_<" |
|
去o左郵局寄野比阿聰同埋Dennis~ 又了多件心事~ 唉...今日拎o左d相去哂~ d 效果真係出奇的差~ 我都唔知點影o既~~影成咁都有o既~ 見得人o既, 只係得幾張~ 幾張都係貓貓o既相~ 唉...好過冇啦~ |
|
好耐都冇同媽咪去行街~ 今日一路行, 佢又同我o係度傾阿程~ 講真, 有時諗諗下~ 佢對我真係好好~ 或者, 我唔會搵到一個比佢對我更好o既人... 奈何, 有d野, 我講得太盡~ 我o地真係冇緣就係冇緣...迫都迫唔到~ 點都好啦~ 我諗我宜家應該冇再嬲佢~ 嬲一個人太辛苦啦~ 同埋, 都唔值得o既~~ |
|
昨晚發o左個夢, 呢個夢, 應該唔止發過一次, 應該都有兩三次... 如果發夢真係反映現實, 咁即係話...... 唉~ 都係冇謂講比大家聽啦~ 根本我唔會做d咁o既事~ 講黎都冇用~ |
|
今晚, 我一口氣寫o左4頁日記~ I mean 係手寫o個d~ 並唔係呢度寫o個d~ 好多野寫~ 不過大部分~ 都係講楠楠o既~~v_v |
|
今晚加藤提醒o左我一樣野~ 呢個網頁o既存在~ 我唔多唔少~ 都係想有一個人會黎睇~ 唉~ 不過o個個人黎睇o既機會~ 數值等於零~ v_v |
|
今晚o既心情, 有邊個會知? |
|
原來唔洗等聽日~ 就已經有一千人黎過啦~ 好開心~~ ^_^ 但係, 邊個係第一千個黎呢~? 我就仲未知啦~ |
|
呢個網頁~...我聽朝起身o個時~ 應該會有過千個人黎睇過~~ 好開心~~ 邊個係第一千個人黎睇我個網頁~ 記得話我知~~ |
|
發現o左一首歌幾好聽~ 係Savage Garden o既 I Knew I Loved You~ 記得有時間搵黎聽聽喎~~^_^ |
|
近來, 都幾多野寄~ 今晚, 我又包好寄比阿聰o既野~~哈哈~~ 我包佢睇我d字o個時~ 睇到暈陀陀~~ 唔信? 到時睇下點~~~ |
|
我最唔鐘意人o地冇交帶~ 一聲不響就走o左~ 咩意思? 當我係咩~? 紊流~ 講緊你~ 上年又係咁, 今年又係咁~ 咩態度~? 唔該, 唔好年年都o係年尾侵入我o既生活~ 我唔想我每年o既年頭, 都同自己講~ 我最憎呢一年o既來臨~ 得唔得?? |
|
我其實都好耐冇去過街市啦~ v_v 唔好話我大小姐~ 我真係最憎去街市~ 濕漉漉咁~ 又掛住好多肉呀~ 又有好多死o左o既魚~ 見到都想嘔~ 唔係為o左影番一d童年回憶, 我死都唔去~~ 以前細細個~媽咪帶我去街市~ 我永遠都只會企o係街口等佢~ 於是媽咪就問我, 你咁唔鐘意去街市~ 你第時點煮飯呀? 咁我就答啦~ 第時請工人咪得囉~~ 哈哈~~細個o個時, 我已經咁大小姐~ 唉~~真係比自己激鬼死~ 所以, 如果有人令我入廚房煮野食~ 呢個人o係我心目中o既地位一定唔少~ |
|
今日幾好訓~ 因為天氣凍o左~ 都唔係幾願起身~ 唉~~好一個下雨天~ 為我帶來的, 便是失望~~ 原本諗住天氣好, 可以去影相~ 我要影o既, 係o係街市買砵仔糕同一d小食o既檔攤~ (影相o既主題係"my favour", 我細個o個陣~好鐘意食o個幾檔野o既小食~ 所以咪去影囉!) 落雨~ 又點會開丫~ 唉~ v_v 但我都走o左去碰運氣~ 睇下呢個世界有冇奇蹟~ 點知...真係冇奇蹟o架~ >_<" 當我去到街市, 由街頭行到街尾都冇o既時候~ 真係好唔開心o架~~ 聽日, 係最後o既希望~ 如果有奇蹟~ 就好啦~~^_^ 明天, 我要見到太陽伯伯~~ |
|
終於見到一個人改o左個icq名~ 一天都安樂哂~ 有甩難o既感覺~ 成日以為同我阿哥傾過icq一次咁大把~ 就當自己係阿哥o既朋友~ 我最唔鐘意係咁... 我阿哥都係比面我, 先同你傾咋~ 哈哈~~ |
|
當發現~身邊最重要的你, 要離開~ 心情會怎樣? 以上o既兩句野~ 出現o係我icq o既info入面~ 但係, 我只係"係咁二"講下o架咋~ 冇人會離開我~ 而我都冇最重要o既人~ 所以~ 唔好亂諗野~ |
|
世人膚淺o既眼光話比我聽一d事~ 原來, 我許下的諾言~ 要付出很大的代價~ 可是, 我並不介意~ |
|
今晚裱好一張板畫~ 寄比三哥~~ 哈哈~我講o左送比佢好耐o架啦~ 點知~ 成日都唔記得~v_v 哈哈~今晚見冇野做~ 咪拎哂d"架餐"出黎裱野囉~ 張板畫印o左3張咁大把~ 一張自己keep~, 一張比dennis~ 一張o係阿sir度~ 我應該唔會再有機會印過o架啦~ |
|
打開盒火柴, 諗住點起一枝... 點知, 我唔捨得點喎~... 唔捨得點o既原因有好多...可能...仲未係時候~ 總之, 我好多謝二哥阿聰~~ 放心啦~ 你冇做錯~ 我唔會對住d 火柴喊o架~ 信我啦~ ^_^ |
|
3點幾, 比人激到嬲嬲o地~ 走o左出去影相~~行下~ 散下心~ 一落到樓下~ 派o左信~ 有一個袋仔放o左o係我屋企o既信箱度~ 一睇~ 係我o架~~ ^_^ 係阿聰寄比我o架~ 我即刻打開黎睇~ 真係有好大盒o既火柴~好開心好開心呀~~多謝你~ 由於我冇帶袋出去~ 只係拎住部相機就算~ 不過, 我唔捨得放低呀~ 所以我用手拎住, 麻煩都冇所謂~~ ^_^ 我去o左影貓貓啦~~~ 本來想去街市搵d 攤檔黎影o既~ 但搵唔到d 岩心水o既~v_v 算啦~ 聽日有時間, 再影過~~ 我行到去樓梯街, 坐o左o係d樓梯度, 睇阿聰寫比我o既信~ 其實o係呢封信入面, 本來最重要o既, 係d火柴~ 但, 我宜家發覺, 火柴都係其次~ 舊冰河石先最重要~ 我好鐘意呀~ 而且背後o既意義...好緊要~ 我會好好保存~ 之後, 影o左陣相~ 又返黎lu~ o係呢個幾鐘頭時間入面~~ 心情轉變得好快~ 唔開心咁走出屋企o既門口, 開心o既心情返番黎~ 我返黎之前, 經過一間茶餐廳~ 聞到d好香o既味道~ 於是我走o左入去~ 叫o左薯條食~ 果然~ 茶餐廳同M記o既薯條好唔同~ 茶餐廳o個d好好味, 又熱喎~ 正呀~~ 都講過~ 其實tum我好簡單o架啦~~ |
|
今朝一早起身online, 諗住check e-mail~ 點知個死人hotmail, server down 鬼o左~ check 唔到~ 返到黎...諗住再check~ 又係check 唔到~~ 好黑~ 好嬲呀~~ |
|
唉...今日去相鋪問...哂黑白相要幾耐~ 結果佢個答案話比我聽~ 要成5日咁耐~ 問o左幾間, 幾間都係咁答我~ 唔開心呀~~>_<" 我成個計劃破壞哂~~ 究竟, 我仲影唔影黑白好呢?? 有冇咩地方, 可以一日哂好o架~? 星期四, 我點交功課喎~~v_v |
|
重覆去想一些沒有結果的東西... 好像沒有什麼用~ 我昨天說, 我不再想你~ 到今晚, 我又再想你~ 唉~~我自己都唔知自己想點...-_-" |
|
其實我真係好冇用~v_v 我去到你o既hp, 想留言, 又或者畫d公仔比你~ 但係, 到最後, 我都click o左"x"... 唉... 諗o左少少野~ 我呢兩年, 都唔會諗住偷偷去再見你~ 我決定兩年後, 先會再出現o係你面前~ 到時, 我希望我已經有份好好o既工, 一切都生活得好好~ 兩年後再見... |
|
公開大學做野果然係有效率~ 我o係網上填o左自己d 資料, 諗住拎本課程概覽黎睇睇~ 過o左一日咋嘛~ 我就收到啦~ 真係快~ 我諗住讀產品設計及科技學榮譽理學士~ Bachelor of Science with Honours in Product Design and Technology 不過要讀o既野~ 全部都好深... A Foundation in Applied Mathematics, A Foundation Course in Physics and Chemistry, Principles and Practices of Management, Mathematical Methods, Computing Fundamentals, Programming and Database, Discovering Physics, Electronics and Control Systems, Materials: Engineering and Science, Microprocessor-Based Computers, Engineering Mechanics: Solids, Environmental Control and Public Health, Design: Principles and Practice, Design for Manufacture and Assembly, Engineers in Society, Quality and Reliability, D&T Project Course, Environmental Legislation and Management, Relational Databases, Programming Languages and Java Programming, Graphs, Networks and Design, Innovation: Design Environment and Strategy, Inside Electronic Devices, Computer Aided Design, Mechatronics. 以上o既野~ 有好多, 我完全未接觸過~ 我唔知我應唔應該試下? 但既然我真係有心讀~ 我就唔需要再諗咁多~ 我要同我自己講~ 我一定有能力讀落去... 其實, 讀書係自己o既... 我將來有冇前途, 就要睇下我識唔識把握學習o既機會啦~ 大家要支持我呀~~ ^_^ |
|
變態o架~~v_v 我今日畫o左成5個鐘~ 先畫好兩張工筆畫~ 隻手都梗o左~ 好慘呀~~ 迫於無奈, 我噴o左d 藥o係手度~ d 藥味好嗅o架~ 不過...冇計~ 鬼叫d 藥真係有用咩~ 噴o左真係好d~~ |
|
其實再次諗起阿match, 係因為習慣o左~ 我都唔知, 我現在係咪仲好鐘意佢~ 次次病, 我都會諗起佢~ 我估~ 我係掛住佢... 不過可能已經係變o左另一種掛住~ 即係話, 好似掛住一個朋友仔咁掛住佢~ 哈哈~ 似乎又諗通o左d~ 係件好事黎~ |
|
我o係阿match o既hp, download o左一首歌~ 係Aero Smith 唱o既~ I Don't Want To Miss A Thing~ d歌詞好似講緊我o既心情... 唉...我唔止錯過o左你~ 我仲好掛住你~ |
|
今晚其實心情冇咩特別~ d朋友仔陸續話比我聽~ 佢o地收到我o既X'Mas card啦~ 個個都同我講, 佢o地好開心~ 不過...我寄出去o既就多啦~ 唔知會收返幾多呢~ 雖然, 我咁諗, 似乎唔係幾好~ 但...收到聖誕card o個種感覺, 真係會好warm o架~ ^_^ |
|
上個月o既9號, 我識o左個人~ 咁快又一個月~ o係呢個月入面, 傾o左好多好多野~ 直頭玩到傻o左~ 幾開心o架~ |
|
今日聽o左一個好好笑o既笑話~ 主角係gary~ 佢諗住拎個火機黎聞下~ 點知佢個白痴~ 整著o左個火機, 搞到d火燒到佢d鼻"x"... 搞到佢聞野都"lone lone o地~" 當然, 其中有d形容詞呀~ 名詞呀~ 太核突~ 唔方便o係度講~ 費事人o地睇到咁嘔心啦~ |
|
今日病...咩心情都冇, 食而無味~ 好慘慘呀~~v_v 昨晚又發冷又發熱, 又發惡夢~ 唉...好恐怖呀~ |
|
成日o係度聽"自己發電"... 哈哈~~聽得好開心~ d歌詞好得意...聽o左心情都好d~ 咪先咪先...~ |
|
哈哈~~今日好忙好忙呀~ 做書刊設計d功課, 真係唔講得笑... 唉...頭先畫畫下, 唔小心click錯o左唔知咩掣, 部電腦就熄o左... 正當我不段咀咒緊部電腦o既時候, 我o係桌面發現到...auto backup 呢個icon, 即刻開心返~ 好彩冇事... 如果唔係, 就前功盡費啦~v_v 丫~ 今日, 某d人應該收到d野, 雖然就好似早o左d... 但係, 早到好過遲到丫嘛~ ^_^ |
|
通常d人識我耐d, 都會發現我有一個問題~ 就係好任性... 我得唔到o既野, 我會放縱自己, 一係死爭, 一係就放棄... 取而代之, 我會用其他好多o既野o黎代替我想得到o既野~ 我不嬲都冇咩理智, 有理智o個個, 都唔係我啦~ 點解? 點解流星雨又要出現...? 出現o左, 又消失... 唉... 又玩我... 我實記住你... |
|
一個男仔, 激嬲o左一個女仔. 女仔話要走, 個男仔又話要走. 跟住, 女仔話, 你唔洗走, 我走... 之後, 個男仔講...不如大家都唔走, 好唔好? 個女仔答...唔好... 其實, 當時個女仔心入面已經冇再嬲~ 就係因為o個句"不如大家都唔走...".... 最後, 都和好如初~~ happy ending... |
|
...功課... ...功課......功課... ...功課......功課......功課... ...功課......功課......功課......功課... ...功課......功課......功課......功課......功課... ...功課... ...功課... 唉...功課多到好似聖誕樹咁... 日日都做...做...做... 救命呀~ |
|
今日好黑仔... 出o左門口, 搭van仔仲要搭o左幾個街口, 先知唔記得帶功課...v_v 於是, 即刻落車, 跑返屋企... 昨晚又係咁...我同阿楠, 立仔玩鋤大dee... 唔知點解, 我成日都hold機... 仲要只係得我先係咁... 勁唔開心~>_<" |
|
前排同細佬講, 我o地下年會一齊讀公開大學... 但昨晚, 我又去o左公開大學o既網頁度睇... 再次睇番我想讀o個科o既資料, 唉... 發現到一樣野~ 原來, 其中要修讀o既一科, 係有數學要讀o架~ 大件事... 我最憎就係數學... 而且睇佢個勢, 都知道唔係普遍o既數~ 咁即係話, 好危險...v_v 點算好...?? |
|
所謂的精神寄託, 原來是空無一物... 依然是老樣子的生活, 沒有什麼改變... 唉...我明o既~ 都係努力d吧啦~ |
|
今晚悶到我死~~ 本來諗住開檀, 做工筆畫功課... 不過...又冇咩mood~ 之後諗住做書刊設計o個d... 但係我岩岩裝番o既corel draw, 原來未裝番中文font入去... 中文字體隻碟又唔知去o左邊~ 唉... 有阻滯... 所以, 都係唔做...v_v |
|
我以為...大家有著同一樣的興趣, 就能夠愉愉快快地傾談... 但, 原來我錯了... 事實不是這樣的. |
|
昨晚等的電話, 結果, 沒有打來... 算啦~ 唔緊要啦~ 或者後來有野做都未定, 所以唔記得o左啦~ 不過, 昨晚玩icq, 同楠楠傾o左好耐... 之後, 最尾o個時, 又扮嬲... 今朝起身, 一online, 就成17個message send 黎~ 差d嚇鬼死~ 但係, 我好多謝佢咁信我囉~ 有咩都同我講~~~真係好啦~ 其實我幾忙, 例如, 我d聖誕card仲未寫好啦~ um...外國o個d, 現在仲唔去寄, 就寄唔切o架啦~ 所以, 要快d寫先得...寫..寫..寫...-_-" 當然, 仲有o個d可惡, 做極都做唔完o既功課啦~~~ |
|
昨晚, 發生o左件事... o係上年同樣的時間, 侵入o左我o既生活. 今次, 沒有再想太多~ 因為唔到我去諗... 今日, 放o左學去德興飲茶, 唉~~好鬼唔掂~ 水準差哂~ v_v 之後行o左一陣~ 返到屋企, 就開始做攝影o既封面, 做o左好多野...不過出黎o既效果, 係好簡單, 好多野, 都變得多餘~ 算啦~ 都做好o左~~唔理啦~ |
|
其實細佬講得岩~ 我呢d人, 係要用d殘忍d o既方法, 比人迫下, 先會改... 幾時...我先會改到呢?? 細佬食煙食到嘔血~~唔知佢有冇睇醫生呢... 哎呀~ 好擔心tim~~v_v |
|
其實有d人幾殘忍, 完全唔識得去體諒人~ 唔識將心比已~ 我當你係朋友, 我先同你講我屋企d野~ 但既然你完全唔當我係朋友~ ...咁咪算囉~ |
|
嘩~ 今朝起身好凍凍呀~~v_v 返學仔, 上新堂~ 上攝影~ 個阿sir姓蕭, 英文名叫jeffrey~ d課程講到好似好吸引咁... 仲打正招牌, 夜晚去影相~ 順便去玩~~ 今日成日電話都冇響~ 唔怪得之啦~ 因為我冇飛9823xx3x落905xx8xx度, 返黎check番~ 兩個來電都唔知係邊個搵我...算啦~唔諗啦~ 有事搵我, 自然會打過黎` 返到屋企, check e-mail, 好開心呀~~ 有回覆~ 仲講o左d幾令我開心o既野tim~~ 立仔~ 你唔好同我爭呀~ 你爭唔贏我o既~~哈哈~ |
|
唉...十一點幾, 心情本來已經唔係咁好, 點知比誌傑踩多兩腳, 就仲死得快d~ v_v 宿敵, 成日都話係宿敵... 是但啦~ 你鐘意o既話, 點止係宿敵...仲會係仇人tim呀~ |
|
有什麼事也好, 希望你知道, 我會在你身邊... 就像當我失意時, 你在我身邊支持我一樣... 所以幾時都話, 朋友係最重要...^_^ 哈哈~當我睇上次"悠長假期"o既預告o個時, 我都比以上類似o既說話, 感動到... 你有需要, 即管同我講... 我會從你找我幫忙當中, 搵到自己o既存在價值~ |
|
玩icq, 大大話話, 都玩o左幾年... 當中, 識到的人...可能只是平水相逢, hi and bye o既 friend. 不過亦有一些很知心的朋友, 好似例如我d阿哥啦~ 細佬啦~ 每一段時期, 我都對自己講~ 夠啦~不要再玩了, 傾黎傾去, 咪又係o個d野~ 乜唔覺得悶o架咩? 但係, 講完之後, 反而更熱愛玩~ 我自己都唔明點解...>?< 其實, 咁耐以黎, 我終於發現一樣野~ 就係, 每一段時間, 我都會因為一個人特別而去online~ 好似近排同邊個熟...我就會成日online等佢~ 見唔到佢, 我會好失望... 呢d感情, 通常hold唔到幾耐~ 因為好快, 就會覺得冇野可以再講~ 已經試過好多次係咁... 唔知係icq d感情, 係咪真係easy come, easy go o架呢?? 唔知, 有冇奇蹟...? |
|
我是一個自以為是的人嗎? 想想...有時候是吧~ 可是, 那是不知不覺表現出來的. 原因有很多, 可能是由細到大, 身邊的人都很遷就自己吧... |
|
我曾經很珍惜一個男孩, 當時那不清不楚的關係, 總叫我心情起伏. 可是亦因為很喜歡他, 我用了很殘忍的方法, 希望可以把他留在身邊. 結果, 我失去了他. 但我的愛, 好像從來都沒有離開過他... 回憶起有關他的事, 每次都會令我很不開心, 究竟, 我真的那麼犯賤嗎? 所有人都設法去找尋快樂, 可是, 我偏偏自找痛苦. >_<" |
|
其實我的問題很嚴重, 媽咪一直都叫我去看看醫生... 可是, 我都沒有去... 我左邊的身體, 由頸開始, 至到腳, 都有一種很不自然的感覺. 成日都感到很累... daddy話, 可能我坐的姿態不正確... 又經常夜訓... 加上, 我床上面o既公仔, 多到...唔知張床係比公仔訓, 定係比自己訓... 哎呀~ 好辛苦呀~~v_v 我頂唔順啦~ 好煩呀... |
|
難得休閒的星期天, 我坐在床上, 看了一整天書... 已經看了一本, 現在正看著第二本... 那不是令人一再追看下去的小說, 只是散文... 很久已經沒有在家沖好立克飲了... 熱烘烘的, 好味道呀~ 天氣又凍番少少... 希望會再凍d就好啦~ |
|
哎呀~ 阿哥仲未同我裝番d野呀~v_v 搞到我夜晚冇得上網~ 我好想知阿楠仲有冇事呀~~ 但又on唔到line... 好衰o架~~~o'.'o 唔知佢開心仔番未呢... |
|
今晚好多野想講tim~ 今日約o左阿yan 8:30等, 但我7:30就已經出o左門口, 原因係...我想去附近睇下書丫嘛~ 因為一個男仔, 我愛上了看張小嫻的書... 唔知點講, 我會覺得, 當我看著那個男孩所看過的書, 心入面, 就會有種...同佢好接近的感覺. 其實我近來買o左好幾本張小嫻的書了~ 還未看完... 今晚, 我又發現多一本那個男孩所看過的書... 於是想也沒有想, 又買了下來... 我知我咁做, 仍然係好傻... 不過, 我只係想同佢o既思想接近d o者... 係傻, 但係...唔係錯... |
|
講真丫~ 我幾憎我姑姐~ 扮哂野咁...成日冇錢, 就唔好死沖啦~ 仲話係咩咩名媛...慳d啦~ 從今晚佢o既態度, 我同我自己講~ 我將來o既成就, 一定會比佢好~ 一個人, 自己有o既係尊嚴, 對別人, 有o既係尊重. 佢既然自命係咩咩名媛, 好心佢就拎d修養出黎啦~ 唔好以為我呢d後輩, 就唔洗尊重~ 佢唔好有一日比我見到佢衰到貼地呀~ 我會笑佢o架~ 佢唔比面我, 我洗咩比面佢呀~ 話我寸都係咁話o架啦~ |
|
各位, 可能睇完v4, 會覺得我今晚幾開心... 其實, 今晚都發生o左一件相當唔開心o既事~ 搞到我好驚...好擔心~ 正當我準備入去睇首映o個陣~ 我阿哥以前個女朋友打黎... 又同我講o左d令我好擔心o既野~ 收o左線, 我即刻打電話比阿哥~ 點知...佢已經返o左屋企... 當時聽到, 手都震震o地~ 因為佢明明講過今晚要去飲~冇理由會咁快返屋企~ 於是我扮冇野, 收o左線啦~ 跟住, 再打電話比daddy, 叫佢即刻快d返屋企~ 驚阿哥有事... 再過o左一陣~ 我又打比daddy, 睇下佢返到屋企未啦~ 佢話返到, 仲話阿哥冇事tim... 即刻放下心頭大石... 我真係好怕屋企有d咩事...我係屋企o既一份子~ 我想佢o地知道, 我幾時都會咁在乎, 咁緊張呢個屋企~ 我要我屋企人齊齊整整, 健健康康... 就係咁簡單咋~ |
|
睇完首映返黎, 都成十二點lu~ 都幾好睇丫~ 張智霖都幾高幾型... 不過最大收穫唔係見到chi lam, 而係見到教正稿o既阿sir~ 從佢口中, 我同阿yan得知可以搵到430更進一步o既資料~ 好開心呀~~~ 我o地已經決定寫封信去"警民關係科", 等佢轉交比430~~ 哈哈~ 阿yan話, 今晚訓唔著都似~ 真係誇啦~~ 睇完, 我o地去o左食野~ 依然係懷住一個相當high o既心情~ 一路講430, 仲...興奮到打埋電話比阿wing同阿mon~ 估唔到, 因為一個型仔警察, 我o地幾個女仔會搞成咁~~ |
|
見下午得閒, 夜晚先出去~ 於是我又執下個版面啦~ 感覺好似好o左d~ 不過依然肉酸~~哈哈~ |
|
點解楠楠會咁黑仔o架~~v_v 佢個icq list冇哂d人...真係慘啦~ 好彩, 佢都仲記得我... 算啦~~~人生不如意事十常八九~ 一切都隨緣啦~ |
|
我會用盡我o地方法, 留低阿match打電話比我o既o個個call... 咁做...唔知係咪好傻呢? |
|
結果, 阿match都唔去... 其實, 係意料中事~ 冇咩特別唔開心, 係有少少失望o者~v_v 佢話12點之前答覆我, 點知佢唔記得o左... 咁我就用電話send message比佢啦~ 好彩...佢真係冇轉電話...仲好彩o既係~ 我都係用one2free... 佢因為唔知我905xx8xx呢個電話, 所以... 佢以為係第二個~ 所以就打番黎比我啦~ 再次聽到佢把聲~ 係feel到個心跳得好快~ 唉...不過算啦~ 我唔應該再諗~ 聽日同阿yan去, 咪仲開心~ 因為起碼佢如果見到唐唐o既時候, 一定好投入~ 我都會比佢感染埋~ 開心埋一份~ yeah~~~ ^_^ |
|
終於, 我o係一日內, 做好功課, 仲整好埋hp o既X'mas Version... 利害呀~~ 但係...依然都係冇咩效果睇~ 算啦~ 有轉好過冇轉~ 咪當應下節囉~~~ 哈哈~ |
|
仍然在附近 可否聽到我為你哭的聲音 彷彿這空氣內碰到你腳印 焦急得不覺兩手已發震 完美的一生 只須抱擁我用半生的光陰 秋天的風紊亂我心我髮鬚鬢 想好好等你為我一再配襯 我怕終失去 就算再等幾天 仍然未實現 原來人一息間已不會再見 而情懷即使一世不會蛻變 我怕到日後 就在記憶也看不見 完美的一生有你的聲音 總給我動能 漆黑中指引 遠或近... |
|
我今晚, 做o左d好唔應該做o既野~ 我個心好亂, 明明好想見到呢個人, 但係又好怕見到佢... 唔知呀~~~好驚呀~ 雖然現在我都唔知個結果, 不過佢去, 我又驚~ 唔去, 我又失望...v_v 如果可以再見一次, 我死而無憾... |
|
咁快又一個月lu~ 本來我都唔諗住做聽日o個d書刊設計o既功課o既~ 但最終...都過唔到自己o個關~ 猛去barbie d 網頁度睇~ 搵d岩o既相黎做功課~ 終於...都做好啦~ 不過今次就整到好細張~ 哈哈~ 冇計啦~~鬼叫我唔夠膠片咩~ 係要將就下o架啦~ 昨晚, 好出奇地~ 我十二點唔夠就訓o左~~ 唔知呀~ 好頭痛~ 玩玩下icq, 好辛苦~ 平時楠楠o係度, 我根本唔會咁快就走~ 但真係頂唔順~ v_v 訓醒覺, 都好返d~ 原來, 昨晚楠楠唔開心呀~ 因為佢有個friend唔讀lu~ 跟住諗住去打機, 又成日hang 機~ 去gameeast玩, 又遇到d衰人... 希望佢今日已經冇唔開心啦~ 我起身online o個時, 見到佢留d offline message比我, 睇到我差d喊咁滯~~ 因為真係feel到佢當我係好朋友... 聽日如冇意外~ 我會有"跑馬地的月光"o既慈善首映睇~ 因為今次只係得一張~ 所以我都唔知搵邊個同我去睇~ 我第一時間, 就諗起搵Athena, 點知佢已經約o左人...v_v 叫同學...叫得一個, 唔叫得一個, 又好似好衰咁... 心目中, 係有一個人選o既~ 但我打極電話都未有人聽~ 今晚如果都搵唔到佢... 最後, 或者我會同阿哥去睇到未定...不過呢個會係我最後o既選擇囉~ |