ATHINE  - "Shpresoj që negociatat për nënshkrimin e Marrëveshjes së Stabilizim-asociimit me Bashkimin Evropian të fillojnë në muajin prill, por kjo do të varet nga ecuria e zhvillimeve politike në vend". Kështu tha ministri shqiptar i Integrimit Evropian Paskal Milo, në një intervistë dhënë Radio BBC, të cilës i referohet agjencia maqedonase e lajmeve MIA. Milo ndodhet në Athinë ku nënshkroi një Protokol bashkëpunimi për asistencë ndaj përpjekjeve të Shqipërisë për nënshkrimin e Marrëveshjes së Stabilizim-asocimit me BE-në. (BalkanWeb)

TIRANE - Një 19-vjeçare nga qyteti i Tiranës humbi jetën dje në mbrëmje, pasi ra aksidentalisht nga ballkoni i shtëpisë së saj. Ajo quhej Adriana Hoxha, dhe ishte banuese në rrugën "Stavri Themeli" në kryeqytet. Hoxha ra nga ballkoni i shtëpisë së saj që ndodhet në katin e katërt të një pallati. Sipas burimeve zyrtare të policisë, 19 vjeçarja Hoxha u dërgua menjëherë në spital, por nuk mundi të mbijetojë për shkak të frakturave të rënda që kishte pësuar në pjesë të ndryshme të trupit. Grupi hetimor i mbërritur në vendngjarje tha paraprakisht se rrëzimi i viktimës nga ballkoni ka qenë aksidental, megjithatë "hetimet ende vazhdojnë". (BalkanWeb)

TIRANE  - "Pjesëtarët e koalicionit Bashkimi për Fitore e kanë përgatitur platformën, që do të paraqitet në takimin e Brukselit në 24 janar. Partitë e 'BF' po përpiqen për të gjetur zgjidhjet e duhura ashtu siç kanë rekomanduar përfaqësuese të OSBE-së dhe të ODHIR-it". Kështu u shpreh sot zëdhënsi i Bashkimit për Fitore, Edi Paloka, në një konferencë për shtyp. Më datën 24 janar përfaqësues të koalicionit të BF-së dhe të PS-së do të nisen për në Bruksel, ku do të paraqesin platfomat përkatëse.  (BalkanWeb)