HILELISTO

Esperanto-revueto por la etika kulturo

Numero: 17 Dato: 01.06.2001

NEŬTRALECO?
el la letero de André Caubel (10.11.1935)

De 19 jaroj mi estas esperantisto. Mi partoprenis en la movado, ankaŭ kiel instruisto kaj gvidanto, sufiĉe por pretendi ioman sperton. Pli kaj pli mi konvinkiĝas, ke la t.n. neŭtraleco mallarĝigas la koncepton de Esperanto, sekigas, malvigligas kaj malvivigas la movadon…

La neŭtraleco estas nur hipokrita oportunisma vualo… Kiel Zamenhof ofte montris, la flanko ideala estas multe pli grava. Laŭ liaj difinoj, la "interna ideo" de Esperanto estas "frateco kaj JUSTECO inter ĉiuj popoloj" (Geneve 1906), celas "forigi la murojn inter la gentoj kaj alkutimigadi la homojn, ke ĉiu el ili vidu en sia proksimulo nur homon kaj fraton" (Krakow 1912).

Alivorte, la celo de Esperanto estas paco kaj tolero: ni forigos tion, kio disigas la spiritojn kaj konservos tion, kio kunigas la korojn.

Tiun doktrinon ni alte levu, kiel ni levas ĝian simbolon, la verdan standardon. Ne estas ni kulpaj, ke ĝi aspektas revolucia en nia maljusta kaj maljustema mondo…

Por konfirmi tiun revolucian econ, sufiĉas aldoni ke niaj kontraŭuloj ĝin bone rimarkis…

La neŭtraleco permesis ke la lasta kongreso okazu preskaŭ en la mezo de militpreparoj, ke kongresoj fariĝu simplaj turismaj ekskursoj, ke en ili oni pli kaj pli forlasu la internacian lingvon…

Estingiĝas la interna ideo (plu nur vorto, fuŝe uzata), nun tremanta lumeto, anstataŭ la hela arda flamo kiu devus varmigi kaj vigligi!

Konkludante mi atentigas, ke mi apartenas al neniu politika partio, al neniu dogma religio…

Sed mi volas libere pensi...

(Publikigata kun la permeso de la filino de Andre Caubel - R. C.)

 

LA IDEALA ŜTATO LAŬ TOMASO MORUSO

Tomaso Moruso (1478-1535) estis unu el la plej eminentaj reprezentantoj de la (angla) renesanca humanismo. Laŭ historiaj fontoj Moruso estis escepte nobla homo: forte homama, verema, principema… Estinte dum la reĝo Henriko la VIII-a lordo-kanceliero, li preferis perdi prestiĝan ŝtatoficon (kiun li konsentis akcepti nur post persista insisto de la reĝo) kaj eĉ la vivon, ol rezigni de sia prefero de la katolika eklezio kiel internacia kaj sendependa de sekularaj aŭtoritatuloj, kompare kun - laŭ volo de Henriko la VIII-a - tiam en Britio fondiĝanta nacia eklezio subigita al la reganto. Pro tio li estis enkarcerigita kaj ekzekutita. La ĉefverko de Tomaso Moruso estas priskribo de imaginara ideala ŝtato - Utopio.
Utopio de Tomaso Moruso estas organizita laŭ la demokratia principo. Ĉiu funkciulo estas reelektata, krom la reganto - kiu, foje elektita, plenumas sian funkcion ĝisvive, krom se li estiĝos suspektita pro tiranemo. Ŝtataparato de Utopio estas kiel eble malpli granda. En la ŝtato ne estas konstanta propra armeo ĉar ĉiuj civitanoj estas edukataj por partopreni en la defendomilito. En Utopio ne estas privata posedaĵo. La ĉefa celo en la ŝtato estas feliĉa vivo plena de kontento por ĉiu (unuopa) homo.
Laboro principe estas deviga por ĉiuj. La plej malpezajn kaj malagrablajn laborojn plenumas - interalie - homoj kiuj estas korektcele punigitaj pro ilia socie neakceptebla sinkonduto. La laboro estas maksimume racionaligita, por ke homoj havu kiel eble pli da libera tempo por la kultura kreado. Deviga taga laboro daŭras nur 6 horojn kaj tio tutsufiĉas ĉar celo de la produktado ne estas kiel eble pli granda privata profito, sed produktado de elementaj vivrimedoj por ĉiuj civitanoj laŭ iliaj realaj bezonoj.
Edukado estas akirebla por ĉiuj kaj ĝi ne estas monopoligita. Ĉiu edukiĝas laŭ propraj emoj kaj ecoj de sia karaktero. Ĉiu unuopa homo mem decidas pri sia familia vivo, pri pasigado de sia libera tempo.
Religio estas apartigita de la ŝtato. Ĝi baziĝas sur la prudento. Ĝi konsistas el nur kelkaj ĝeneralaj principoj. En la ŝtato estas libere praktikataj diversaj kultoj.
Moruso malŝategis kulton de ŝtatperforto, ekspansiismo, kulton de la reganto kaj absolutecon de lia volo, amoralajn politikajn rimedojn. Li malŝategis plej diversajn brutajn kaj rafinitajn metodojn de la ekonomia rabado de homamasoj.

(laŭ: Tomas Mor UTOPIJA, "Kultura", Beograd 1964; preparis Mato Špekuljak)

(el: Tomas Mor UTOPIJA, "Kultura", Beograd 1964; elektis kaj esperantigis Mato Špekuljak)


Hilelismo kaj Esperanto

Se eĉ ciuj akademioj de la mondo akceptus Esperanton, se eĉ milionoj da personoj ĝin uzadus - nenio garantias, ke en la daŭro de unu jaro ĝi subite ne estos forĵetita kaj forgesita por eterne!… Lingvo internacia fortikiĝos por ĉiam nur en tia okazo, se ekzistos ia grupo da homoj, kiu akceptus ĝin kiel sian lingvon familian, heredan. Cento da tiaj homoj estas por la ideo de lingvo neŭtrala multege pli grava ol milionoj da aliaj homoj.

Mi estas profunde konvinkita, ke nek solvo de la hebrea demando, nek enradikiĝo de lingvo neŭtrala estos iam ebla sen hilelismo, t.e. sen kreo de neŭtrala popolo.

Tiel same kiel la hilelismo ne povos ekzisti sen lingvo neŭtrala, tiel same la ideo de lingvo neŭtrala neniam povos vere efektiviĝi sen hilelismo!

L. L. Zamenhof en la letero al A. A. Kofman de la 15.5.1901 (laŭ la “Literatura Foiro” No 190)

 

Grava sciigo al ĉiuj rondanoj de Hilelista rondo

Kiel aldonaĵo al ĉi-numero de "Hilelisto" estas publikigitaj lastaj proponoj de membroj kaj simpatiantoj de Hilelista rondo koncerne planitan transformiĝon de Hilelista rondo en Esperanto-Societon aŭ Esperanto-Asocion. Pri la proponoj membroj de Hilelista rondo decidos per la voĉdonado dum la Hilelista renkontiĝo okazonta en Zagrebo (Kroatio) de la 23-a ĝis la 26-a de julio 2001. La transformiĝo mem (pro malhelpo flanke de LKK de samsemajna kaj samloka UK), depende de la prefero de plimulto da membroj, ne okazos, kiel komence estis planite, kadre de la Renkontiĝo, sed, dank' al bonvolemo de KCE el La Chaux-de-Fonds, povus okazi la 16-an de decembro 2001 en La Chaux-de-Fonds (Svisio), samtempe kaj samloke kun la Zamenhofologia semajnfino dediĉita al la centjariĝo de hilelismo de L. L. Zamenhof.

La pormomenta kunordiganto


Forumo

Jerzy el Pollando:
Bovolu sendi al mi provnumeron de la bulteno “Hilelisto”. Mi estus tre dankema, se vi sendus al mi esperantaĵojn, kiuj estos eldonitaj okaze de la Kongreso. Bedaŭrinde pro multe da laboro mi ne povas partopreni la Kongreson.

Zhang el Ĉinio:
Mi interesas pri via revuo "Hilelisto". Ĉu vi povus sendi provnumeron al mi? Antaudankon.

Vladimir el Slovakio (aldonklarigante siajn pensojn publikigitajn en No16 de HILELISTO):
Mi ne postulis, ke la societo restu nur sur bazo, kiu estus kreita nur el la morala instruo de nun ekzistantaj religioj. Mi atentigis, ke eĉ tiam necesus krei certan doktrinon, difinantan etikajn kaj moralajn principojn. Mi estas homo ekumene orientita, mi estas malfermita al interreligia dialogo kun nekristanaj religioj, mi havas geamikojn, kiuj ne estas kredantoj, sed kiuj respektas altajn moralajn principojn. Ili fariĝis miaj geamikoj pro siaj altaj moralaj principoj.
Surbaze de la kreota Principaro mi decidiĝos, ĉu alighi aŭ ne (rim. de la redaktoro: al Hilelista rondo). Se la Principaro estos diskutata rete, mi pretas partopreni en la diskuto.
Mi decidis ankoraŭ ne aliĝi, surbaze de la nur aliĝdeklaracio, en kiu mi trovis ununuran moralan principon: "Kio ne estas agrabla al vi, tion ne faru al homo alia." Tio vere estas tro malmulte. Imagu, ke vi vicigus ĉiujn etikajn kaj moralajn principojn sur la akso de iksoj. Vi difinus nulan punkton sur tiu ĉi akso. Sed se vi komparus vian akson kun akso de iu alia homo, vi konstatus, ke li havas nulan punkton ŝovitan al pli altaj plusaj au minusaj valoroj. Do, tion, kion li rigardas morala, vi jam povus rigardi nemorala aŭ malmorala aŭ male. Tial devas esti difinita certa "doktrino" kiu difinos ĝenerale respektatan akson de etikaj kaj moralaj principoj. Krei "doktrinon" - "Principaron" - estos tre pretenda laboro, ĉar devas esti kreita tia doktrino, kiu ne estos en troa kontraŭdiro kun morala instruo de diversaj religioj. Ĉiu doktrino devas esti viva organismo, ĝi ne povas fariĝi rigida dogmo, ĝi devas respeguli signojn de la tempo.

Dmitri reage al opinio de Vladmir (No16 de HILELISTO):
Jes, la "doktrino" de ĝenerala etiko estu difinita. Ĝuste por tio ja estis kreita la rondo. Ŝajnas, ke unu el niaj unuaj agoj post nia oficiala fondiĝo devus esti iu "Deklaracio pri universala etiko", kiun ni zorgeme kreu, pridiskutu kaj aprobu kaj kiu estu publikigota. En tiu deklaracio estu difinita nocio "universala etiko" kaj reguloj por ĝia aplikado. Kompreneble, la nocion kaj regulojn ni difinu sur bazo de hilelismo/homaranismo. Sed en la deklaracio neniu religio aŭ mondkoncepto estu menciita, por ke la Deklaracio estu taŭga por ĉiuj homoj.

Gary (simpatianto el Germanio):
Efektive, mi vidas neniun malhelpon konsideri min simpatianto, do mi petas vin alkalkuli min al tiu kategorio. Mi ne aliĝas kiel membro, ĉar mi ne kredas, ke mi povus kunlabori laŭ maniero, kiun la membroj rajtas atendi unu de la alia. Estas ja ankau tiel, ke mia intereso por la rondo estas iom unuflanka: min interesas pli ol ĉio alia la kontraunaciismaj trajtoj en la pensado de Zamenhof, kiuj estas des pli imponaj, ĉar ili prezentas fruan formon de tio, kion ni hodiaŭ nomus "multkulturismo", kaj ĉar Zamenhof eldiris ilin en tiel frua epoko. Eĉ hodiau okazas, ke esperantistoj apogas la reakcian koncepton, laŭ kiu unuopa etno povas kolektive kaj ekskluzive proprieti "sian teron", je kiu ili havas "historian rajton". Plaĉis al mi, ke vi citis en la lasta numero 16 de "Hilelisto" la eldirojn de Zamenhof pri tio. Multaj el la malfeliĉoj de la 20-a jarcento fontas el tio, ke oni aplikis ne ĉi tiujn principojn, sed tiun de la t.n. rajto de (etne difinitaj) popoloj je memdetermino, aŭ tiun de "etnokratio", kie bezonata estus demokratio. Cetere, mi nun verkas longan tekston pri la pretendata potenciala rolo de Esperanto kiel savanto de etnaj lingvoj, kaj la rilato de tiu ideo kun etna diferencismo kaj naciismo.

Benoit:
Ni, membroj de Hilelista rondo, devus almenaŭ ne ignori la diversajn signifajn tendencojn de la vortoj “hilelisto” kaj “homarano” en la lingvo-uzo de Zamenhof kaj de nuntempaj elstaraj Esperanto-parolantoj.

Eva F. T. el Hungario:
Min multe interesas la profundaj ideoj de Zamenhof. (Ili rim. de la redaktoro) estas tre proksimaj al mia koro.

Alcino:
Kun granda atento mi akompanas la organizadon de nia Rondo. Kontaktinte aliajn rondanojn mi konstatis la mirindan kunsenton pri la ĉefaj principoj, kio lasas antaŭvidi solidan kaj fruktodonan estontan organizon.

Dmitri:
Ĉu eblas (aŭ eblos estonte) kelkobligi nombron de la paĝoj de "Hilelisto", ekzemple ĝis 10-12, por ke estu eble publikigi pli ampleksajn materialojn pri diversaj instruoj/konceptoj? Ne, mi ne diras, ke ni tuj faru tion, sed estonte...

Respondo de la redaktoro al la supra propono de Dmitri:
Estas natura deziro de ĉiu rondano kaj alia leganto de "Hilelisto" (momente "Hileliston" legas iom pli ol 40 esperantistoj) ke la bulteno-revueto estiĝu almenaŭ duoble-trioble pli ampleksa revuo por la etika kulturo. Laŭ nuna stato de aferoj "Hilelisto" povus estiĝi tia ek de ĉi-julio, estiĝonte la monata revuo. Monata aperado de "Hilelisto" malplialtigus dissendokostojn kaj ebligus pli kvalitan preparadon de la bulteno-revuo, eĉ kun la sama (pormomenta) redaktoro.

Respondo el Sennacieca Asocio Tutmonda koncerne eblan kunlaboron inter SAT kaj HILELISTA RONDO:
Elkoran dankon pro via afabla propono kiun la Plenum-Komitato de SAT traktis en sia kunveno de la 30-a de majo. Pri via propono ni informos la kongreson de SAT en Nagykanizsa, kaj ni estus kontentaj se iu el vi povus partopreni ĝin. La kongreso decidos. Iu el ni kiu partoprenos la U.K. en Zagrebo partoprenos vian kunvenon. Ni jam akceptas vian proponon pri interŝanĝo de niaj gazetoj.
Kun sinceraj salutoj,
Por la Plenum-Komitato de SAT
Krešimir Barković


Decidu la renkontiĝo (06)

Memkandidatiĝo de Mato por la tasko de la kunordiganto (prezidanto)

Mi kandidatiĝas por la tasko de la kunordiganto, sed nur se kandidatiĝos neniu alia. Mi preferus ke iu alia kandidatiĝu, aŭ, ankoraŭ pli bone - ke kandidatiĝu kelkaj rondanoj.

Memkandidatiĝo por la tasko de la anstataŭiganto de la kunordiganto (vicprezidanto), ricevita de Dmitri la 22-an de majo 2001

Mi proponas min por la tasko de la anstatauiganto de la kunordiganto. Pli volonte mi prenus la taskon de la eldonisto, sed la obstakloj de mia vivo ne permesas al mi tion. Povas esti iam poste...

Memkandidatiĝo por la tasko de la kasisto, ricevita de Jeremi la 23-an de majo 2001

Mi oficiale proponas min por la tasko de la kasisto se tiu estus bezonata aŭ/kaj dezirata.

Propono de Mato pri la Aliĝdeklaracio

 

ALIĜDEKLARACIO DE LA MEMBRO DE

.............................................................................

-------------------------------------------------------------------------------

E n k o n d u k o

.................................................. (mallongige: ..........) estas .......... por la universala etika kulturo. Ĝi estas fondita la .................... en .....................

D e k l a r a c i o

01. Kiel la fundamentan universaletikan principon mi akceptas jenon: "Kio ne estas agrabla al vi, tion ne faru al homo alia".

02. Morale bonaj aŭ malbonaj agoj de homoj dependas ne de iliaj rasaj, kulturaj, religiaj, naciaj, profesiaj kaj aliaj sociaj apartenecoj, sed de ĉiu konkreta homo mem.

03. Mi aliĝas al ..................................................... por kune kun aliaj membroj de ..................................................... partopreni en la interna praktikado kaj ekstera popularigado de la universala etika kulturo.

-------------------------------------------------------------------------------

Persona nomo:

Familia nomo:

Naskiĝjaro:

Profesio:

Poŝta adreso:

Retadreso:

Persona TTT-ejo:

Dato:

Subskribo:

-------------------------------------------------------------------------------

Miaj proponoj kaj deziroj:

Propono de Mato pri la Statuto

 

STATUTO DE

.............................................................................

-------------------------------------------------------------------------------

A. Ĝeneralaj principoj

1. Titolo kaj daŭro.

La nomo de ………. estas .................................................. (poste en ĉi tiu Statuto: "..........").

2. Inspiro.

La inspiro por fondi ………. estis projektoj hilelismo kaj homaranismo de Ludoviko Lazaro Zamenhof (1859-1917).

3. Konsisto.

.......... konsistas el individuaj membroj - personoj en aĝeco ne malpli ol 18 jaroj, civitanoj de iu ajn lando de la mondo.

4. Celo.

La celo de .......... estas interna praktikado kaj ekstera popularigado de la universala etika kulturo.

5. Rimedoj.

Por atingi siajn celojn ..........:

a) eldonas monatan revuon por la etika kulturo "……….";

b) eldonas librojn, broŝurojn kaj aliajn eldonaĵojn;

c) organizas kongresojn, seminariojn kaj aliajn aranĝojn;

ĉ) tenas sian retpaĝejon kaj retforumon;

d) kunlaboras kun aliaj organizaĵoj kies agado enhavas universaletikajn idealojn.

6. Lingvo.

La oficiala lingvo de .......... estas Esperanto

7. Sidejo.

La sidejo de .......... estas en (urbo), (lando).

8. Administra jaro.

La administra jaro estas unujara periodo inter du sinsekvaj Kongresoj.

B. Membroj

9. Membriĝo.

Oni estiĝas membro de .......... akceptinte la Aliĝdeklaracion, en ĝia esperantilingva versio, kaj enmaniginte aŭ alsendinte (per kutima poŝto, faksilo au retpoŝto) plenigitan aliĝilon al la prezidanto.

Ĉiun novan membron de .......... la prezidanto envicigas en konstante aktualigatan Liston de membroj, akireblan de ĉiu membro de .......... rete senpage kaj per la kutima poŝto kontraŭ rekompencado de sendokostoj.

10. Eksiĝo.

Membro kiu skribe petas la prezidanton eksigi lin el .......... estas konisiderata kiel eksiĝinta.

11. Eksigo.

Membro kiu kontraŭlaboras la celojn de .......... kaj/aŭ morale aŭ materie damaĝas .......... povas esti de la Kongreso eksigita el ...........

Post unujara nemembreco eksigita membro rajtas peti de la Kongreso permeson denove aliĝi.

C. Oficohavantoj

12. Oficohavantoj.

Ĉiuj oficohavantoj de .......... estas ĉiujare reelektataj per la dumkongresa voĉdonado, surbaze de skribaj memkandidatiĝoj de la membroj.

La oficoj estas sensalajraj kaj ĉiu oficohavanto elspezas proprajn rimedojn por plenumi sian oficon.

13. Prezidanto.

La prezidanto:

a) prezentas .......... en juraj aferoj kaj subskribas ĝiajn dokumentojn;

b) gvidas la agadon de .......... inter du sinsekvaj Kongresoj;

c) kunvokas kaj prezidas la Kongreson kaj aliajn aranĝojn de ..........;

ĉ) prezentas al Kongreso raporton pri la agado de .......... inter du sinsekvaj Kongresoj.

d) redaktas kaj distribuas la organon kaj aliajn eldonaĵojn de ..........;

e) prizorgas retpaĝejon de .........;

f) prizorgas Liston de membroj.

14. Vicprezidanto.

La vicprezidanto laŭbezone helpas al la prezidanto kaj anstataŭas lin.

La vicprezidanto estras la retforumon de ..........

15. Kasisto.

La kasisto prizorgas financajn aferojn de ..........

La kasisto estas deviga prezenti al la Kongreso raporton pri la financaj aferoj de .......... inter du sinsekvaj Kongresoj

Ĉ. Kongreso de ..........

16. Celoj.

La Kongreso de .......... (aliloke en Statuto: "la Kongreso") kiel ĉiujara asembleo de membroj de ..........:

a) aprobas aŭ malaprobas jarraportojn de la prezidanto kaj kasisto;

b) elektas oficohavantojn por la nova periodo inter du sinsekvaj kongresoj;

c) difinas/redifinas Aliĝdeklaracion;

ĉ) decidas pri regularoj ordigantaj tiun aŭ alian agadkampon de ……….;

d) decidas pri la kunlaboro kun aliaj organizaĵoj;

e) decidas pri la eksigo de membroj;

f) decidas pri la dato kaj loko de la sekvonta Kongreso.

D. Dumkongresa voĉdonado

17. Povoj.

Ĉiujn siajn decidojn .......... validigas per la dumkongresa voĉdonado.

18. Voĉdonantoj.

En la dumkongresa voĉdonado ĉiu membro havas unu voĉon.

19. Proceduro.

Oni voĉdonas pere de voĉdoniloj preparitaj de la prezidanto de ...........

Voĉdoni eblas ankaŭ per la faksilo kaj elektronika poŝto.

La voĉdonadon prizorgas kaj kontrolas tri membroj tiutaske elektitaj de la Kongreso.

20. Decido.

En dumkongresa voĉdonado decidas pli ol duono da esprimitaj voĉoj.

E. Organo

21. Organo.

La oficiala organo de .......... estas la revuo por la etika kulturo "..........".

Jarabono je la retpoŝta versio de .......... estas senpaga, kaj jarabono je la surpaperigata versio de .........., distribuata per la kutima poŝto, eblas kontraŭ 12 IRK (aŭ la kontraŭvaloro en iu ajn internacie ŝanĝebla valuto).

F. Financoj

22. Financaj aferoj.

Financaj aferoj administrantaj de .......... ampleksas enspezojn kaj elspezojn ligitaj kun:

a) organizado de Kongresoj kaj aliaj aranĝoj de ..........;

b) presado kaj vendado de libroj kaj broŝuroj eldonataj de ..........;

c) presado kaj distribuado de la surpaperigata versio de la organo de ..........;

ĉ) permonaj donacoj al ..........

G. Ŝanĝo de la Statuto kaj malfondo de ..........

23. Ŝanĝo de la Statuto.

La Statuton povas ŝanĝi nur decido de la Kongreso.

24. Malfondo de la Societo.

Pri la malfondo de .......... decidas la Kongreso.

--------------------------------------------------------------------------------

La Statuto de .......... estas akceptita dum la 1-a Kongreso de .......... la .................... en .................... Por membroj de .......... validas la esperantlingva teksto. La .......lingva teksto estas tiu registrita per notaria akto kaj valida laŭ la ........ juro.

Propono de la Regularo pri la retforumo, ricevita de Dmitri la 22-an de majo 2001

ESTOS PUBLIKIGITA VERŜAJNE EN LA VENONTA NUMERO DE "HILELISTO" POST KIAM LA PROPONANTO, LAŬ PROPRA PREFERO, LA PROPONON SIMPLIKIGOS KAJ MALPLIGRANDIGOS

Propono de Mato pri la Regularo pri retforumo

 

LA REGULARO DE RETFORUMO DE ..................................................

-------------------------------------------------------------------------------

1. Retforumo de .................................................. (malsupre: la Retforumo) estas reta forumo lanĉita kaj prizorgata de ...................................................

2. Celo de la Retforumo estas ebligo de la reta pridiskutado de etikaj demandoj en la plej vasta senco de tiu vorto.

3. Al la Retforumo oni aliĝas kaj eksiĝas pere de la estro de la Retforumo.

4. La Retforumon estras vicprezidanto de ..................................................

5. Aliĝo al la retforumo ne signifas aŭtomatan membriĝon en .................................................. nek mebroj de .................................................. aŭtomate estiĝas retforumanoj.

6. Ĉiu retforumano estas deviga respekti la Regularon.

7. Estro de la Retforumo:

- teknike prizorgas la Retforumon;

- zorgas pri tio ke diskutoj en la Retforumo fluu kongrue kun la celo de la Retforumo;

- zorgas pri tio ke en la Retforumo regu reciprokaj afableco, tolero, respekto inter retforumanoj;

- avertas retforumanoj okaze de trompado de la Regularo;

- ekskludas el la Retforumo retforumanojn kiuj persiste ignoras aŭ malrespektas la Regularon;

- informas anojn de la retforumo pri ŝanĝoj koncerne regulojn.

8. Lingvo de la Retforumo estas Esperanto.

9. La revuo de .................................................. (malsupre la Revuo) rajtas libere (sen peti aŭtoran antaŭkonsenton) transprenadi kaj en sia rubriko "Diskutejo" publikigadi partojn de diskutoj el la Retforumo.

10. Ĉe la publikigado de partoj de diskutoj el la Retforumo la Revuo, sen antaŭkonsento kun la konkreta retforumano, rajtas ŝanĝadi originajn vortojn nur ortografie.

11. La Regularon aprobas la Kongreso de ..................................................

Propono de Mato pri la Universaletika Principaro

UNIVERSALETIKA PRINCIPARO

(Rimarko: citaĵoj estas ne laŭvortaj sed laŭsencaj)

Beleco

La bono estas bela kaj la malbono malbela.

(Aŭrelio I, 2.1)

Bonfaroj

Korpaj bonfaroj estas: ne mortigi, ne ŝteli, ne praktiki maldignajn seksajn rilatojn.

(Siddharta I)

Parolaj bonfaroj estas: ne mensogi, ne paroli vulgare, ne paroli vente.

(Siddharta I)

Spiritaj bonfaroj estas: ne envii, ne teni malbonhumoron, ĝuste kompreni la aferojn.

(Siddharta 1)

Dio

La plej altan Forton ĉiu rajtas prezenti al si laŭ sia prudento kaj koro.

(Zamenhof I)

Dungitoj

Dungantoj devas esti justaj rilate dungitojn.

(Moseo V, 24.15)

Edukado

Estiĝi pli bonaj al homoj helpas pensoj de saĝaj virtuloj.

(Sokrato I, 4.2)

Egoismo

Pro la propra plezuro detruante alies bonon, oni agas maljuste.

(Moruso I)

Eterneco

Nenio malaperas en nenion.

(Aŭrelio I, 5.13)

Etiko

Sen la etika kulturo homaro ne havas estontecon.

(Einstein I)

Feliĉo

Feliĉe vivas kiu pensas kaj faras bonon.

(Aŭrelio I, 5.34)

Funkciuloj

Tasko de funkciuloj estas servi al homoj.

(Jesuo M, 20.25-26)

Ĝuo

Nur la prudenta kaj digna ĝuo donas feliĉon.

(Moruso I)

Kulpo

La kulpo estas individua.

(Moseo V, 24.16)

Homaro

La tuta homaro estas unu organismo.

(Aŭrelio I, 4.4)

Homo

Valoro de ĉiu homo dependas de lia persona agado.

(Zamenhof I)

Honoro

La honoro de la alia homo meritas la respekton same kiel la proprapersona.

(Eliezer P, 2.10)

Juĝado

Juĝado devas esti justa.

(Moseo III, 19.15)

Juĝo

Nur juĝo rajtas kondamnadi.

(Moseo V, 25.1)

Justeco

Justeco konsistas en traktado de ĉiu laŭ la merito.

(Aristotelo I)

Karaktero

Neniu povas esti lasita al si mem por fari kion li ekvolas.

(Ŝopenhaŭero I)

Kulturo

La kulturo plibeligas vivon de bonaj homoj.

(Aristotelo I)

 

 

 

Lando

Ĉiu lando apartenas egalrajte al ĉiuj siaj loĝantoj.

(Zamenhof I)

Malbono

Proprapersona malbonfarado ne povas esti pravigita per sekvado de amasoj farantaj malbonon

(Moseo II, 23.2)

Malriĉuloj

Malriĉuloj estas helpindaj.

(Moseo V, 15.7)

Moralo

La esenco de moralo kuŝas en la homa koro en formo de konscienco.

(Zamenhof I)

Naturo

Nenio kion faras la naturo estas nebezona.

(Aristotelo I)

Nobleco

Nobleco estas grandanimeco kaj toleremo rilate la aliajn homojn.

(Konfuceo I)

Ora regulo

Kion ni ne volas ke aliaj homoj faru al ni, nek ni faru al aliaj homoj.

(Hilelo II)

Paco

Antaŭkondiĉo por paco estas justeco.

(Hilelo P, 2.7)

Religieco

Religieco estas afero de la persona kredo.

(Zamenhof I)

Ritoj

Ritoj sen homeco estas senutilaj.

(Konfuceo I)

Sinkonduto

Bona sinkonduto malatentigas nek etajn aferojn.

(Ŝopenhaŭero I)

Vero

Personan dekliniĝon de la vero ne pravigas malvera opinio de la plimulto.

(Moseo II, 23.2)

Vivo

Ĝusta vojo de la vivo estas tiu, kiu konvenas al homo mem kaj decas rilate la aliajn homojn.

(Jehuda P, 2.1)

(sekvas referencoj)

Propono de Mato pri la nova nomo por la bulteno/revueto

Ĉar en la proponita de mi Statuto en 2-a paragrafo estas menciita inspiriĝo de la projekto per la hilelismo/homaranismo de L. L. Zamenhof, mi ne plu konsideras necesa konservi la nomon "Hilelisto" por la bulteno de novfonidĝonta societo/asocio. Mi proponas preni la nomon "Lumturo".

Propono de Mato pri la simbolo/emblemo

Kiel la simbolon/emblemon por la societo/asocio en kiun tranformiĝos Hilelista rondo mi proponas lumturon.

Revueto HILELISTO estas bulteno de Hilelista rondo.
Ciuj materialoj de Hilelista rondo estas disponeblaj sur la interreta hejmpago de Hilelista rondo: http://www.oocities.org/hilelistarondo
Abonpetojn je la surpaperigata HILELISTO sendu al la pormomenta kunordiganto de Hilelista rondo:
Mato Špekuljak, Oštarijska 8, HR-10000 Zagreb, Kroatio; retadreso: hilelistarondo@yahoo.com
Por aboni surpaperigatan version de HILELISTO, oni estas petataj rekompenci sendokostojn.