ان كنتي ناويه ع الفراق
انا اعرفك فين الطريق
واعرفك ازاي تفارقي
وانا كنت لك اوفى صديق
لا انا رايح اندم ع الفراق
ولا رايح اصرخ م الالم
وياريت تفارقي من غير كلام
وياريت تفارقي من غير ندم
لاأنا رايح اندم ولا رايح ابكي
ولا رايح ارجع للي كان
انا رايح اسلى ورايح انسى
انك في يوم كنتي الحنان
ولا ح افتكر غدرك معايا
لو ح افتكر تبقي معايا
بشرك وخيرك ارحلي
هوه ده طلبي ومنايا
انتي بعتي واشتريتي
حب تاني ياريت يدوم
وحاطة عينك ع السما
وبتقطفي منها النجوم
كل دي عندك أماني
خلي الاماني تنفعك
بكره ح يصحيك ضميرك
بكره الحنين ح يرجعك
كل ده حلم ف خيالك
وانتي طبع الغدر فيكي
ياريت في مره تشوفي نفسك
لما طبعك بيناديكي
ح تلاقيكي مرايه سوده
والجمال مش ح يداريكي
وانا ياما كنت بداري عيبك
واقول عليكي حنينه
وانا ياما كنت بشوف جمالك
واقول عليكي ملهمه
غير انك انتي بعيده عنهم
غداره ؟!! فيــكي قليُّله
عرفتي انتي ازاي تهوني
مهما كنتي او تكوني
لما قولتي انا عايزه افارق
وانتي كنتي في عيوني
لو صحيتي ح تندمي
وياريت ماتيجي عندي تاني
خلاص محيتك من دمي
***
حسني جاد