لو كل واحد في الدنيا .. بيقدر يختار
لكان يعيش عمره ف جنه

 ويبعد م النار
لكن دي دنيا المال فيها .. دايما بيسود
والحب جنبه آه ياعيني

 عايش محتار

أصل الحكاية اني قابلته يدوب من شهرين
ضحك وشوفته بيندهلي
برموش العين
وعشان ماقلبي رقيق طيب ارتاحت اليه
ووشوشت نفسي وقولتلها
مافي زيه اتنين

انا قولت باين مقسوم لي بعد استنظار
ومش كل واحد في الدنيا
يقدر يختار !!
ومشينا نتكلم حبه ونقول ع الحال
وكلمه منه ارتاح قلبي
وطول المشوار

سألته انت من الدنيا والا من الحور
أو نجمه تاركه لسماها
أو بدر بدور
ضحك وشوفت بياض سنه شيء مش معقول
صفين ياناس دول م اللولي

أو عقد زهور

حسيت ساعتها ان الدنيا بتضحك وتقول
ابسط ياعم شوف الجنه
واتهنى ونووول
مابقيتش داري لا بحالي ولارايح فين
غير اني ارفرف بجناحي
وطاير على طول

وشويه سامعه بيندهلي تعالى ياهيمان
تعالى يالله كده وقوللي
الجيب مليان
وكإن شيء جه صحاني وخلاني أفووق
حطيت ايديا على قلبي
وقولت انا خسران

ولقيته ماشي وبيغرب حتى مابصش
وكانت الدمعة ف عيني
وحتى ماحسش
ولقيتني باقلب ف جيوبي وقولت يادنيا
هوه الفقير في الدنيا دي
مابيتحبش

لو كل واحد في الدنيا يقدر يختار
لكان يعيش عمره ف جنه
ويبعد م النار
لكن دي دنيا المال فيها سايد ومسود
والحب جنبه آه ياعيني
عايش محتار
***

مع تحياتي
عاشق الورد