على مهلك
ليه بـس .. بتتجنى عليَّه على مهلك واستنى شويَّه
دانا قلبي بيداوي ف جرحك ومحتاجة لعطف وحنيَة
والا انت بتفرح لعذابـي دا عشانك ضيعت شبابــي
انا فاكره انك ح تقوللي سامحيني ياأعز أحبابـــي
وانا باحـسب انك ح تجينـي تمسح لي دمعه من عينـي
وتجيب لي الفرح اللي نسيته وف ايدك ورد وتهـــديني
ياخسارتي على عمري الضايع دانا شارية وانت اكيد بايـع
بتقولهــا ياقسـاوة قلبك مش حاسس اني اموت بعـدك
خليك حواليـَّه.. وقدامي خليك ف عنيَّه واحـلامي
وكفايه عذاب فيَّه كفايـه وا رحمني وارحـم أيامي
ليه جايني تزود أحـــزاني تبقى انت عليَّه وزماني
ياعذابي قلبك مـش داري بلهيبي وقسوة حرمــاني
اسمعني واسمع دقـاتي بتقـولك ان انت حيـــاتي
وتحكي لك عن حبي الغـالي وتشكي لك من كل آهاتي
وياريتك تستنى شويــَّه ولا شوفك تتجنى عليـَّـه
وتعالى ح انسى اللي عملته ولاقـيني بعطف وحنيَّه
***