<EnJoY LiFe 81> - Fly Again
上兩個星期係墾丁返黎已經即刻衝去啲旅行社度買機票,
點知搵左幾日,問左好多間都話已經 Full 晒,
啲平機票無晒...啲四日首爾機票忽然間消失晒...
最後,我哋每人要俾多成三百蚊先係康瀛買到張五日首爾機票。
買完機票個下真係好開心架,因為搞左三晚終於去得成喇,
但係過多幾日就開始擔心喇,康瀛仲未出到機票俾我地,
已經追左佢成個星期,佢都話間 Agent 未出俾佢,佢都無辦法,
結果精神緊張左成個禮拜,我出發之前一晚先收到張 E-ticket,
放下心頭大石.....(多謝好朋友,仗義出手,幫我上康瀛追)
十號收工之後,返屋企食完飯,再執下個行李就出發去機場喇。
去到水街咁啱有架 A10 停左係車站,媽咪幫我追上去截住架巴士,
我即刻拎個行李衝上車,上到車緊係要處理左件行李先啦,
最低個架行李架已經無晒位,個行李又好鬼重,一拎起個行李,
架車就急速轉左個大彎,當然係放唔到上去啦.....
諗諗下架車應該到機場先會再停架喇,點都要搵方法係架車飛緊個陣放到上去,
最後,試左三四次,紮行馬,拎起個行李,再用大脾一野踢左個行李上去。
搞左咁耐,差不多成車人都望住晒(個架係單層巴士),當然即係衝到車尾坐啦。
去到西隧出口原來有個站架...個司機忽然間氣衝衝走到車尾,同我講:"小姐你未俾錢呀!"。
唉呀,燶爆喇!個司機都唔駛咁惡架!我張八達通搭車又唔駛我俾錢,我點會專登唔俾錢呀,
我平時搭火車都專登坐頭等用盡公司啲津貼架啦,頭先掛住搞個行李唔記得左拍卡之麻.....
幾驚風波,終於到左機場喇,因為遲左少少 check-in,我地三個人竟然要分開坐.....
仲要分得好鬼開,23F,31J 同埋 38J.....好彩我隔離坐左個好好人嘅伯伯,
佢讓左個位俾我哋,結果我就可以陪到第一次搭飛機嘅 Vilia 坐喇!
第一次搭凌晨機,諗住食埋個飛機餐先訓,點知等左好耐先有得食。
揀左個 Seafood Noodle,但係啲麵好乾, 同埋所謂嘅 seafood 係得啲蝦米咋...~_~
食左少少野,諗住訓覺啦,點知對耳仔愈來愈痛,完全訓唔到 ~
我哋凌晨四點幾已經到左首爾仁川國際機場喇。咁早都未有車搭,
唯有周圍影下相,同埋換左啲韓幣先。
( 原來係機場換錢真係最抵架, 我地睇啲 forum 話市區換平啲, 無係機場對晒啲錢...
結果周圍搵左好耐都搵唔到平過機場換嘅.....~_~ )
我哋係機場 hea 到六點幾,先有頭班機場巴士去明洞。去到明洞,行錯路,
搵左好耐先搵到間 GuestHouse。我地放低啲行李就即刻出左明洞行下,
可惜朝早八點幾所有鋪頭都未開,我地只可以 window shopping。
係條街行黎行去都幾凍下,所以走左入呢間 Donut 店食少少野先。
買左個 Donut 上左上面坐下,呢度都整得幾靚。因為成層都無人,
我地猛咁係度影相,仲玩埋自拍添。個 Donut 就凍凍哋,嘛嘛哋喇.....
終於等到百濟蔘雞湯開鋪喇,我哋正式享受今日好豐富嘅早餐:
人蔘雞湯同埋人蔘烏骨雞湯。啲湯好香人蔘味,飲落去好鮮甜,
啲雞裡面仲釀左啲糯米,好正!可惜尋晚無訓過無嘜胃口,唔係食左好多。
食完早餐,我地就出發去第一個景點 COEX Aquarium。
個水族館以聖誕節為主題特別整左個展覽館,設計好特別,裝飾得好靚!
仲有哈哈鏡玩添 ~
當日不斷有一班又一班嘅幼稚園生黎參觀水族館,啲小朋友真係好得意呀!
除左陸龜同大蜥蝪,我哋仲見到隻好搞笑嘅魔鬼魚,佢係咁跳出水,好似想跳出黎咁 ~
今次借左阿霍公子部相機去旅行,影到啲靚靚珊瑚相,真開心!
不過最開心都係見到係墾丁見唔到嘅大海龜,呢度有三四隻大海龜呀,
每隻身長都有成米半咁長,好大隻架,超級興奮呀!^_^
That's my life! =D
VienneTTa 11-December-2008
-------------------------------------------------------------------------------