ANG MGA PAGLALAKBAY
Jose Rizal
(Sipi sa La Solidaridad,
pahayagang makademokrasyang lumalabas tuwing ikalabinlimang araw. Taon I,
Bilang 7, Barselona, ika-15 ng Mayo, 1889.)
Sino
ang hindi nakapaglakbay? Sino ang hindi nawiwili sa mga paglalakbay sa mga
ito'y siyang pangarap ng kabataan sa unang pagkaalam niya ng kahalagahan ng
buhay, sa ang mga paglalakbay ay isang aklat para sa mga may sapat na gulang,
kapag ang paglulunggati ng karununga'y siyang kinaaabalahan ng diwa, at sa
wakas, ang mga paglalakbay ay siyang huling pahimakas ng matatanda kapag
nagpapaalam sa daigdig upang tumahak sa lalong pinakamahiwagang landas?
Ang
paglalakbay ay isang humaling ng kamusmusan, isang simbuyo ng kabataan, isang
pangangailangan ng mga tao at isang malungkot na tula ng katandaan.
Huwag
ninyong basahin sa mga bata ang Robinson ni ang Gulliver, kung hindi ninyo nais
na malingaw sa mga tanong hinggil sa mga bayang iyong ang mga panghalina'y
ipinagiging maramdamin ng kanilang kaisipan; huwag ninyong ilarawan sa mga bata
ang mga damdamin, ang mga biglang pagbabagu-bago, pakikipagsapalaran sa mga
bansang banyaga o kaya'y di-kilala; alisin ninyo sa mga mata nila sina Julio
Verne, Mayne Reid, sapagka't kung hindi, ay pupukawin ninyo ang mga gabi nila,
at maidaragdag pa ninyo sa sumisilang nilang hangarin, na balabalaki't
mapupusok, ang isa pang magpapasakit sa kanila sa pagkapailalim sa iba o sa
kanilang kakapusan ng salapi. May napakalaking pangganyak sa mga kababalaghang
di-kilala, napakalaking panghalina sa pagmamasid sa kalikasan!
Katutubo
na sa tao ang pagnanasa sa paglalakbay gaya ng pagnanasa sa karunungan, na tila
baga yao'y inilagay ng Lumikha sa bawa't isa sa atin, upang sa udyok niya'y
pag-aralan at kamanghaan natin ang kanyang mga gawa, makipagtalastasan at
makipagkapatiran tayong pinapaghiwalay ng kalayaan, at kapag nagkakaisa na'y
bumubuo ng iisang angkang lunggati ng tanang mga palaisip.
Sa
dahilang ito, kaya ang tao'y ginawang mamamayan ng daigdig, nilikha ang mga
dagat upang sa ibabaw ng nahahawing katawan nito'y makapagpadulas ang mga
sasakyang-dagat; ang hangin, upang siyang makapagtulak at makapagpatakbo ng mga
yaon; at ang mga bituin, upang siyang makapamatnugot kahit sa gabing lalong
madilim; at ang ilog na bumabagtas sa iba't ibang dako. Siya'y nagbukas sa mga
batong malalaki ng mga lulusuta't daraanan, nagtayo ng mga tulay, nagbigay sa
arabe ng mga kamelyong gagamitin sa mga malalawak na ilang, at ng reno at aso
sa mga naninrahan sa mga napakalamig na kadulu-duluhan ng lupa, upang humila ng
mga sasakyan nilang walang gulong na ginagamit sa yelo.
Ang
buong pagkakasulong ng mga lipunang makabago ay utang na lahat halos sa mga
paglalakbay. At sa katunayan, buhat pa sa kauna-unahang panahon, ay naglalakbay
na ang mga tao sa paghanap ng karunungan, na para bagang ito'y nakasulat sa mga
lupi ng dagat, sa mga dahon ng mga punong-kahoy, sa mga bato ng lansangan, sa
mga bantayog at mga libingan.
Ang
mga griyego'y nagsadya sa Ehipto upang humingi sa mga pare nito ng aral;
nagbasa sila ng mga papiro at natilihan sa panonood ng napakalaking libingang
makulimlim na kinatawan ng kaisipang pambansa; sila'y sumimsim ng sigla sa
kanilang luksang kadakilaan, gaya ng ginagawa ngayon ng mga pantas sa Europa sa
mga heroglipiko o di-madamulat na titik; at buhat doo'y nagsiuwing mga dalubhasang
pilosopo, gaya ni Pitagoras, mga mananalaysay, gaya ni Herodato, mga
mambabatas, gaya nina Likurgo at Solon, at mga makatang gaya nina Orfeo at
Homero. At ang relihiyon, ang kabihasnan, ang mga agham, ang mga batas at ang
mga kaugalian ay nanggagaling noon sa Ehipto, bagaman sa pagsadsad nilaa sa mga
nakangiting baybayin ng Elade, ay naghuhubad ng kanilang mga mahiwagang bihis
upang magsuot ng pangkaraniwan at kaakit-akit na kauutan ng mga anak na babae
ng Gresya.
Pagkatapos
buhat sa tudling na iginuhit ng isang araro'y gumitaw ang isang bayang malakas,
masipag, dakila, palalo, at kahanga-hanga. Buhat sa kanyang kapitolyo ay
pinagala ang tingin sa daigdig, na naging karapat-dapat n apakay ng isang
kasakimang walang hanggan, at nagpalagablab sa kanyang mga hangarin. Pinawalan
ang kanyang mga limbas at pinalakad ang kanyang mga kawal. Sa pagbalik ng mga
ito'y nakasinghaw na sa karwahe ang lahat ng mga bansa. Ang Gresyang napakaliit
ay nahigop ng Roman lalong mapagwagi, datapuwa't ginawa ng Gresya sa Roma ang
ginawa rin ng Ehipto sa Gresya; tinuruan ng Gresya ang mga anak ng
Roma,pinalamutihan ng mga gawa ng kanyang mga anak ang mga lansangan at liwasan
nito; at amh lahat niyang karunungan, agham, pilosopiya, mga sining ukol sa
kariktan at panitikan, ay inilipat sa Roma, at bagama't ang mga yao'y nahawahan
ng angking panghalina't kariktan, ay naragdagan naman sa kadakilaa't
kamarhalikaan sa pagpapakilala ng wani (genio) ng bayang palalo. Sa
gayo'y nasaksihan sa Roma ang nangyayari ngayon sa mga bayang bihasa hinggil sa
pagpapahalaga't paggaya sa mga bagay-bagay na galing sa Pransiya; ang
kabihasnang griyego ay nakapasok sa lahat ng dako, ang mga tula't mga salita
niya'y nagpalipat-lipat sa mga bibig, ang mga kaugalia't pilosopiya niya'y
tinularan at isinagawa. Ang agham nga at ang kabihasnan na hanggang sa mga araw
na yao'y naging pag-aari ng Silangann, sa pagtulad sa katutubong takbo ng mga
buntala, ay nagtungo sa Kanluran, bagaman nang dumating na sa puso ng daigdig
ay tumigil na para bagang ibig magturo sa lahat ng mga bansa't mga lahi. Nang
panahong yaon, ang Iberya, Galya, Germanya, Bretanya at pati na ang Aprika ay
nagpapadala ng mga anak nila sa lunsod na siyang tagpuan ng kapangyarihan, ng
karunungan at ng kayamanan, upang makita, hangaaan at mapag-aralaan nila sa
maluwang na pook na nakukubkob ng mga pader, ang tanang nahaka ng isip ng tao
hanggang sa panahong iyon. Palabas na itinanghal sa lahat ng panahon ng
sangkatauhan ang pagtungo nito sa liwanag upang ang lupa'y matanglawan. Ang
sanhi nito ay sapagka't kalakip ng kalikasan ng tao ang pagkahilig sa
kaganapan, gaya ng kalakip ng pinakabuod ng mga katawan ang kabigatan, gaya rin
ng kalakip ang diwa ng kaliwanagan sa pagkilala sa araw.
At
habang tumatanda ang mga bayan ay nawawalan ng katas na nagpapalusog sa kanila
noong unang panahon, at isinisilang naman ang ibang bayang lalong bata upang
maging tagapagmana niyaong mahalagang kayamanang natipon ng malaking angkan ng
sangkatauhan sa pamumuhunan ng panahon at mga pagpapakasakit.
Nabigo
ang pagpapakawala ng Hilaga ng mga sigwa upang maghatid ng kamatayan sa
masasayang lunsod ng Europa; walang napala ang kamangmangan at kabuktutan sa
pagkapagsimsim sa ibabaw ng libingan ng Romang panginoon ng daigdig; kung ang
agham ay tumakas na nasisindak, ang gayo'y upang magpalakas lamang sa
pagkakaligpit sa mga klaustro at nang buhat dito'y muling makalabas na hindi
nahuhutok at matatag, at inaakay ng kakristiyanuhan upang imulat ang mga mata
ng pulutong ng mga taong walang tutol na nagtangkang sumakal sa kanya.
Sa
gayo'y itinatag ang mga Pamantasan. Maraming mga nangagsidayo buhat sa lahat ng
dako upang pumasok sa mga pamantasan, at ginawa nila ang ginawa ng mga griyego
sa Ehipto, ng mga romano sa Gresiya, at ng buong sandaigdig sa Roma at
Bisansiyo. Sa lahat ng mga panahon at sa lahat ng mga kapanahunan ng
kasaysayan, ang mga paglalakbay ay siyang naging matibay na suhay ng
kabihasnan, palibhasa sa paglalakbay lamang nahuhulog, naaaralan at namumulat
ang puso't diwa, sa dahilang sa paglalakbay lamang nakikita at napag-aaralan
ang lahat ng pagkakaunlad, ang mga karunungang gaya ng Heolohiyang nauukol sa
anyo't pagkakabuo ng lupa, ang Heograpiyang naglalarawan ng iba't ibang panig
ng lupa, ang Politikang natutungod sa pamamahala, ang Etnolohiyang nauukol sa
iba't ibang lahi ng tao, ang Lingguwistikang nauukol sa iba't ibang wika, ang
Meteorolohiyang tumatalakay sa mga pangyayari sa papawirin, ang kasaysayan, ang
mga hayop, ang mga halaman, ang Estadistika, Eskultura, Arkitektura at Pintura
at iba pa; lahat ng nasasangkap sa kaalaman ng tao ay dumaraan at nabubunyag sa
mga mata ng manlalakbay.
Sinumang
nakakakilala ng lahat ng lupa, ng topograpiya ng isang bansa, sa pamamagitan ng
mga mapa at planong sinusuri sa loob ng isang tanggapan ay magkakaroon ng isang
kaalaman, hindi ko sasabihing hindi, datapuwa't isang kaalamang kawangis ng
kaalamang maaaring makamit ng nakakakilala, sa pamamagitan ng mga lathalain ng
mga pahayagan, ng mga opera ni Meyerber o Rossini. Maaaring makitang nakaukit o
nakalarawan ang isang buong lupain, at ang pagkakakilala ng naglalarawan sa
lupaing iyon ay maaaring napakaliwanag na naari niyang ilipat sa kayo ng isang
silahis ng araw ng lupain, ang kalamigan ng kanyang langit, ang kasariwaan ng
kanyang mga parang, ang kamarhalikaan ng kanyang masaganang daloy ng tubig at
mga bulubulundukin, ang mga mamamayan at mga hayop at sampung paggalaw na
ikinikintal sa damo ng magaang na paghampas ng pakpak ng hanging banayad at
palay-palay -- ang lahat ng ito'y pawang maisasagawa ng pinsel ng isang tagapaglarawan
ng mga bansa, gaya nina Claudio Lorena, Ruysdael, o Calame at maaaring higit pa
sa riyan marahil, datapuwa't hindi maaaring agawin sa kalikasan at ilipat sa
kayo yaong buhay na pagkikintal sa alaala na siya lamang ang nakaaalam at
maaaring magbigay, yaong paggalaw, yaong buhay na nasusumpungan sa awit ng mga
ibon at mga punung-kahoy, sa halimuyak o bangong sarili ng pook, sa aywan ko ba
kung anong hindi maaaring maipaliwanag na nadarama nguni't natitiyak ng
manlalakbay at tila gumigising ng mga matatandang gunita ng mga maalindog na
araw, mga kalungkutan, mga katuwaang nagsiyao upang hindi na magbalik; isang
pag-ibig na nalimot, isang larawang minahal sa kanyang kabataang pumanaw sa
gitna ng ipu-ipo ng daigdig, mga nalikhang nagsiyao na, mga kakilala… aywan ko
ba kung ano pa! Mga damdaming malulungkot na nilikha ng anyo, pagmumukha o
singaw ng bansa o kaya'y ng wani, nimpa o Diyos, gaya ng sinasabi ng matatanda.
Maaari ninyong makita sa larawan na sinasalpok ng dagat, halimbawa, ang
baybayin ng Italya nang isang hapong sakdal ganda, kapag ginigintuan ng mga
nakahahalinang silahis ng araw ang mapuputing dampang nakatayo sa mga batong
nababalot ng mga luntia't kulay esmeraldang putong na mga bulaklak; ang tubig
at bulang sumasalpok sa mga nakakubling sinapupunan ng mga batong malalaki,
kaakibat ng nadaramang katotohanang kapanga-pangarap ng mga pook na yaon, kung
maaaring gamitin ang ganitong pangungusap; datapuwa't hindi ninyo napapansin at
napanghihinyangan ninyo ang kawalan ng halimuyak, ng buhay, ng galaw, ng
kadakilaan; hindi ninyo mahahagap ang buong panghalina ng mga itinanging bagay
na yaon, na ginawang walang kamatayan ng napakaraming makata, hindi ninyo
malilibot ng tingin ang panooring yaong nakatawa't matulain, gaya ng
pagkakatawa buhat sa isang sasakyang-dagat ng isang taong magiliw na
hinahagkan-hagkan ng simoy ng hanging nagpapaumbok sa mga layag, at nakikitang
napakarahang tumatalilis na walang iniwan sa pagtalilis ng mga pakpak ng
panaginip sa noo ng sanggol, ng unang kataga ng pag-ibig sa mga labi ng isang
birhen, ng magkakaayos na tunog ng isang malayong orkestra sa katahimikan ng
gabi. Anong mga simbuyo, anong mga damdaming totoong bala-balaki ang sa bawa't
hakbang ay tumitigatig sa puso kapag naglalakbay sa isang bansang banyaga't
di-kilala? Doo'y bago ang lahat: mga kaugalian, wika, pagmumukha, gusali at
marami pang iba…lahat ay pawang karapat-dapat matyagan at bulaybulayin.
Katulad
ng sinsabing ang tao'y dumarami habang ang mga wikang nalalaman at sinasalita
niya, gayon din naman, ang buhay niya'y lumalawig at nababago habang dumarami
ang iba't ibang bansang nadadalaw niya. Lalo siyang nabubuhay sa dahilang
siya'y nakakakita, nakararamdam, nagpapasasa, nakapag-aaral nang sa higit kaysa
hindi nakakita liban sa iyu't iyon ding mga parang at iyu't iyon ding langit.
Sa taong ito, ang mga araw ng kahapon ay siya ring mga araw ngayon at siya ring
magiging araw bukas, alalaong baga'y nagkakasya ang kanyang buong buhay, sa
kauna-unahang bukang liwayway at sa kauna-unahang dapit hapon.
Anong
pagbabago ang hindi nagagawa sa kaisipan ng isang dayo lamang na umalis sa
kanyang lupang tinubuan, at naglilibot sa iba't ibang bayan? Maliit na ibong
datirati'y walang ibong nakikita maliban sa tuyong damong kawad-kawaran ng
kanyang pugad, at ngayo'y nanonood ng mga tanawin, malalawak na dagat, mga
talon ng tubig, mga ilog, mga bulubulundukin at mga kagubatan at lahat ng
maaaring makapag-bigay sigla sa isang mapangaraping gunamgunam. Naitutuwid ang
kanyang mga pasiya't kaisipan; napaparam ang napakaraming pagkabagabag;
napagsusuri sa malapit ang noong una'y hinatulan nang hindi man lamang
nakikita; nasusumpungan ang mga bagong bagay-bagay na pumupukaw ng mga bagong
pagkukuro; kinamamanghaan ang tao dahil sa kadakilaan nito, gaya ng ito'y bulag
na pagkamakanyahin ay nahahalinhan ng pandaigdig at pangmagkakapatid na
pagpapahalaga sa lahat ng ibang tao sa daigdig at nawawakasan ang kanyang
pagiging alingawngaw lamang ng mga kuru-kuro ng iba upang mgapahayag ng mga
sariling palagay, ng mga pasiyang napukaw ng mga tuwira't sariling kaalaman.
Ang pakikisalamuha sa mga tao, ang kahinahunan at matinong pagkukuro sa lahat
ng gawain, ang malalim na pagmumuni, isang kaalamang nagbuhat sa karanasan
tungkol sa lahat ng mga sining at agham, na kung hindi man malalim at ganap, ay
wala namang pagkapawi at tiyak -- naito ang mga pakinabang na maaaring matamo
sa paglalakbay ng isang diwang mapagmatyag at palaaral.
Maaaring
ilarawan ng isang aklat ang mga mamamayan, ang kasaysayan, ang mga bantayog,
ang mga gawa, ang relihiyon-- lahat ng may kaugnayan sa isang bayani; ang
kaalamang ito bagama't kapaki-pakinabang at sapat ay hindi nakasisiya sa
mapaghinalang mambabasa na lagi nang naghahangad na siya rin ang makakita sa
mga bagay-bagay; at malao't madali ay nalilimutan ang mga kaalamang palibhasa'y
hindi natatanim sa alaala, gaya ng sa isang taong nakapaglibot, nakakita,
nakadama at nakapagsuri, sapagka't ang mga ito'y nag-iiwan ng mga kaisipang
ikinikintal ng mga pangyayari sa isang paraang hindi mangyayaring makalimutan.
Ang
mga makabagong bansa'y nakakikilala ng pakinabang na natatamo sa ganitong uri
ng mga pag-aaral at ang lahat ng mga hilig ay nauuwi sa pagpaparami ng mga
sangkap ng pakipagtalastasan.
Sa
ganitong kaparaana'y naiuuwi ng manlalakbay sa kanyang bayan ang mabubuting
paggamit na nakita niya sa mga iba at tinatangkang ang mga yao'y gamiting
taglay ng mga kinakailangang pagbabago; ang iba ay mga kayamana't mga kalakal
na wala sa kanyang bayan; ito naman ay ang pananampalataya, ang mga batas at
ang mga kaugalian; at yaong isa pa ay ang mga kaugaliang panlipunan at ang mga
nababagong pagsasaayos; at sa ganito'y naipapasok ang lahat ng ikabubuti ng
lipunan, pananampalataya't pulitika. Magiging tanda, samakatuwid, ang
pagkakaunlad ng isang bayan ang mabuting kalagayan ng kanyang mga kagamitan sa
pakikipagtalastasan at pangangalakal, gaya ng pagiging tanda ng kalusugan ng
tao ang mahinusay na pagtakbo ng dugo sa lahat ng ugat ng buong katawan; sa
dahilang kung wala ng mga kagamitang ito ay walang pakikipagtalastasan ay hindi
mauunawaan ang mga pagkakabigkis, at kung walang pagkakabigkis ay hindi
maaaring magkaroon ni ng pagkakaisa ni ng lakas, at kung walang lakas ni
pagkakaisa'y hindi makararating kailanman sa kaganapan ni sa pagkakaunlad.
Sa
gayo'y nahuhulo ang pagsusumakit sa pagbubukas ng mga lansangan, mga tunel o
daan sa ilalim ng lupa, mga landas; ang paggawa ng mga tulay, sasakyang-dagat,
tren at daang-bakal, at dahil sa tila ang lupa'y nagiging maliit para sa gayon
karaming pagkilos ay nilulusob pati ng himpapawid na hindi pa natatagalang
isang kahariang sarili lamang ng mga ibon at mga ulap.
Dahil
dito'y naglalakbay, nandarayuhang payao't dito ang lahat ng mga nilikha sa
lupa, buhat sa kulisap na may pakpak na nagpapalipat-lipat sa mga bulaklak, sa
mga halaman at sa mga pastulan hanggang sa daigdig, iyang maliit na manlalakbay
sa kalawakang walang hangga, gaya ng langay-langayan kapag humahanap ng lalong
mabubuting singaw, ng binhing tinatangay ng hangin, ng isda sa mga di-kilalang
kailaliman ng dagat, o ng taong tumutuklas at kumikilala ng malalawak niyang
mga nasasakupan.
Binuksan
na ng Indiya ang kanyang mga dakilang templo at ipinakikita ang mga
diyus-diyusan niyang pagkalalaki gaya ng Tsina, na nagbukas ng mga pinto ng
kanyang mga kuta at ibinubunyag ang mga likha at ani niyang pambihira't
kahanga-hanga. Binuksan ng Aprika at ng Polo Norte ang malalawak nilang ilang
at sa loob ng maikling panaho'y uupo sila sa piging ng pagkakaunlad, at ang mga
pinagkakautangan nila ng kanilang pagkakasulong at kaligayaha'y sina Livingstone,
Stanley at Nordens Kjolo.
LAONG-LAAN