小喬特別介紹既人物！

男朋友~

梗係講而家個男朋友啦，講以前既，會有人嬲架~！而家個男朋友，簡單黎講，就係一隻衝動無耐性既企鵝（雖然佢好似近排變左著豬公，無計，因為我係豬......），缺點呀......咪衝動、無耐性囉！仲有係電腦白痴（我話過唔會嫁個唔識電腦既男人，如果你係佢既friend，好快快教佢喇！）、輕度自大狂、樣衰（雖然佢成日話做民意調查既話無咩人會甘講）、唔錫我（雖然佢又話大把人恨做我呢個位都做唔到窩）、唔係甘贊成我o個種結左婚都一定要出黎做野既心態、大男人主意、又小器又易呷醋......大致上，呢一列都係佢最最最最最明顯既缺點喇~哈哈！不過，無論點，係我眼中，佢都係近乎完美架喇~所有唔好既野我都可以覺得係好既！更可況，佢真係有好多佢既好好好好好處~佢容忍我所有真係錯誤既、縱容我o係佢面前情緒反覆、照顧我所有我唔能夠照顧自己既、始終尊重我有自己既方向同理想、幫助我去改善唔多妥既地方，接受我性格上佢不滿既缺點，體恤我所有或虛無或實在既需要。

好似Kelly對住佢話齋：『呀喬又唔識做家務，又甘巴渣，係你先頂得佢順架乍！』所以，其實我好錫我男朋友，就係甘解喇~！

小五~

一定要好特別甘講我呢隻Tamagochi小雞！小五實在係我最任勞任怨既好朋友~！好多野上面，佢都真係幫左我唔少......呀峻成日都話我俾小五縱壞左喇~~識左小五兩年幾，都差唔多三年喇，o係紐西蘭識。仍然好記得佢第一句走過黎同我&Joyce講既係：『你地識唔識講廣東話架？』（我已經傳哂俾所有人知呢件事喇！）當時，我同呀Joyce係傾緊計，仲係用廣東話傾緊計......甘我又串窩，，咪話：『甘你認為我已家講緊既係咩黎架丫？』小五嚇到走左~（雖然後來熟左之後，小五極力聲稱當時其實心諗，『呀，我以後有救星喇！』）Well,搬返o的陳年舊事出黎講，小五後來死纏爛打甘追呀Joyce，而我，無計，實在太唔可愛啦，小五點會追我丫~！（都好，如果唔係點會有今日既可愛靚仔男朋友呢？！）又著實，小五當時真係太Potato喇~所以咪衰左囉！好彩家下都有個可愛既靈靈唶~！又好彩，小五而家俾我教壞左，無甘薯喇......不特止，仲識串人忝~！

Anyway，小五始終都係我呢世都唔會鍾意既類型！

寧（石頭魚）~

一句講哂，係我由細到大既偶像！雖然佢細我兩個月，但係，佢又靚女、又高、又身材好、又大方、又不拘小節、又勤力、讀書又叻、運動又勁、又開朗、又孝順、又識做家務、又識煮飯、又理智、又係一個好既基督徒、又堅強、又有毅力、又多人追（但係眼角高，到而家都未有一個男朋友），仲可以用佢個救生員牌賺萬二蚊一個月part time工忝！17歲窩！人地又17歲，我又17歲，well...嘻嘻！我識左呀寧已經十三、四年喇~我好似係三、四歲時識佢。同一間教堂，同一間小學，但係唔同中學。而家佢身處香港而我就紐西蘭，但係仍然不斷通信~！佢永遠都係我既Advisor，因為我永遠係感性型而佢係理智分析型！到而家，我都未搵到一個我覺得好過佢既女仔~！如果我係男人，我一定一定一定一定一定會去追佢！！！！！（如果你係男仔，唔好叫我介紹佢俾你識呀！）

總之~絕對~正~！

逑逑~

呀逑絕對係一個好呀哥，好大佬~！佢係我最有力既意見者，我好多事都會同佢講，問佢掂樣做。同呀寧一樣，屬於理智分析型，有過之而無不及忝！我o係佢面前永遠都肆意運用我呢個做呀妹既權利，包括乍嬌，刁蠻任性，同埋扮傻！（堅持係扮下架乍！唔係真係傻架！）逑逑除左可以話係好大佬之外，仲係我既屬靈知己之一 。因為好多時候我唔多屬靈時，佢都會幫我，教我先相信事實，繼而感覺，唔好一味靠感覺行事。

所以話，呀逑永遠最可靠~！

務政-Peter~

務政就冇鬼用啦！佢又係我呀哥，因為我媽咪都當佢係仔，以佢又當我媽咪係佢媽咪，感情上我同佢真係好兄妹甘~！而家佢返左香港U讀Law~法律系呀！都幾叻仔既，除左追女仔之外......佢可以暗戀人地四、五年都唔出聲架！不過，well，一返香港，好快又有新目標喇......所以話丫~男人窩！真係好鬼花心架！

呢個呀哥，好鍾意"嗲"我架~！成日都問：『Jacqualine呀，點算好呀......』我訓覺又要吵醒人同佢傾計窩~好傻好細路仔~！

祖祖~

我同佢，o係我媽咪o個邊屋企呢一代最大既，仲係唯一既兩個女仔，即係，佢係我表妹，細我三個月。感情一直都好好~！我地好少好少嗌交架 ，可能因為我地聚少離多掛！其實，我同呀祖可以話係兩種人，仲係兩個世界既人。我呢個運動白痴，唯一係都算讀得少少書既......以佢雖然唔係太讀得書，但係運動超強！而我地由細到大，鍾意既男仔都唔同類型既~所以從來都唔會爭對象。佢有過好多好多個男朋友喇，而我嘛，嘻嘻，數得出甘少啦~冇人追我嘛！到左而家，佢走既路同我走既路亦完全唔同。佢過左台灣跟老豆學剪頭髮，而我就黎左紐西蘭繼續好老土甘讀書，仲有排讀忝。

不過，無論有幾大分別，我地都係好好既兩表姊妹！

牛奶精 L.C.Lo~

我最錫既先生。Miss Lo係我讀SSGC時候一個教中文既先生。可唔可以話佢好人呢......又唔係真係好好~嘻嘻！但係，佢可以容忍我呢o的甘既學生，都真係出奇。對我既寬容度簡直天下第三！（呀媽第一，男朋友第二！）岩岩上年返香港見到佢，兩年無見，咪又係甘既死樣！冇變~！可能女人到左某一個年紀就變得慢少少掛~！

其實唔單止我錫佢既，好明顯，佢都好鬼錫我架！冇計~我又突出，又特別......特別曳！