(1394-1465)
BALLADE DE L'HOMME ÉGARÉ
En la forest d'Ennuyeuse Tristesse,
Un jour m'avint qu'a par moy cheminoye,
Si rencontray l'Amoureuse Deesse
Qui m'appela, demandant ou j'alloie.
Je respondy que, par Fortune, estoye
Mis en exil en ce bois, long temps a,
Et qu'a bon droit appeler me povoye
L'omme esgaré qui ne scet ou il va.
En sousriant, par sa tresgrant humblesse,
Me respondy: "Amy, se je savoye
Pourquoy tu es mis en ceste destresse,
A mon povoir voulentiers t'ayderoye;
Car, ja pieça, je mis ton cueur en voye
De tout plaisir, ne scay qui l'en osta;
Or me desplaist qu'a present je te voye
L'omme esgaré qui ne scet ou il va.
- Hélas, dis-je, souveraine Princesse,
Mon fait savez, pourquoy le vous diroye?
C'est par la Mort qui fait a tous rudesse,
Qui m'a tollu celle que tant amoye,
En qui estoit tout l'espoir que j'avoye,
Qui me guidoit, si bien m'acompaigna
En son vivant que point ne me trouvoye
L'omme esgaré qui ne scet ou il va.
Aveugle suy, ne scay ou aler doye;
De mon baston, affin que ne forvoye,
Je vois tastant mon chemin ça et la;
C'est grant pitié qu'il convient que je soye
L'omme esgaré qui ne scet ou il va.
Ritornare alla pagina precedente.
Volver a la página precedente.
Back to the previous page.
Retour à la page précédente.
Voltar à página anterior.
Free Homepage by Geocities